2020.02.20

Нийслэлд 2020 онд нийт 105 сургууль, цэцэрлэгийн барилга барина

Улс, нийслэл, дүүргийн төсөв, гадаадын зээл, тусламжийн хөрөнгөөр 2020 онд нийслэл хотод 35 сургууль, 60 цэцэрлэг, 4 бага сургууль цэцэрлэгийн цогцолбор,  5 спорт заал, 1 насан туршийн боловсролын төв, нийт 105 боловсролын байгууллагын барилга ашиглалтад орж, сургуулийн хүчин чадлыг 22,250, цэцэрлэгийн хүчин чадлыг 10,550-иар нэмэгдүүлэхээр төлөвлөж байна.

Нийслэлийн боловсролын салбарын хөрөнгө оруулалтын төсөл, арга хэмжээг эрчимжүүлэх, Улаанбаатар хотод шинээр сургууль, цэцэрлэгийн барилга барих ажлыг эхлүүлэхээс дуусах хүртэл бүхий асуудлыг хэлэлцэн шийдвэрлэдэг Ажлын хэсгийг Нийслэлийн Засаг даргын Хүний хөгжил, нийгмийн бодлогын асуудал хариуцсан орлогч Ш.Анхмаа гуравдахь жилдээ ахлан, хариуцан ажиллаж байна.

Тус Ажлын хэсгийн хуралдааныг 7 хоног тутам зохион байгуулж, мэргэжлийн байгууллагуудын ажлын уялдаа холбоог сайтар хангаж ажилласны үр дүнд нийслэлийн СӨБ-д хамрагдалт 2016 онд 72% байсныг 2019 онд 84%-д хүргэж, гурван ээлжээр хичээллэж байсан 34 ерөнхий боловсролын сургуулийг хоёр ээлжид шилжүүлсэн.

Сургууль, цэцэрлэгийн барилга барих төсвийн асуудал шийдэгдсэн боловч Улаанбаатар хотын хувьд газартай эсэх, зураг төсөв батлагдсан эсэхээс хамааран хүндрэлтэй нөхцөл байдал үүсэж, хугацаа алдан, төсвийг эргүүлэн татуулах, улмаар сургууль, цэцэрлэгийн барилга баригдах боломжгүйд хүрдэг.

Эдгээр асуудлуудыг Ажлын хэсгийн хуралдаанаар нэг бүрчлэн хэлэлцэн, шаардлагатай тохиолдолд нэмэлт судалгааг богино хугацаанд хийж, шуурхай арга хэмжээ авч ажиллаж байна. Тухайлбал, 2018 онд Монгол Улсын төсөвт нийт 94 сургууль, цэцэрлэгийн барилга барих хөрөнгө батлагдаж байснаас 20 байршлын газрын асуудал огт шийдвэрлэгдээгүй, ихэнхи сургууль, цэцэрлэгийн барилга нь зураг төсөвгүй, хэрэгжихэд туйлын хүндрэлтэй байсан. Ажлын хэсгийн хуралдаанаар оновчтой шийдэл боловсруулж ажилласны үр дүнд 2018 оны Улсын төсөвт батлагдсан сургууль, цэцэрлэгүүдээс зөвхөн 1 цэцэрлэгийн барилга худалдан авах төсөл хэрэгжилгүй үлдэж, бусад бүх барилгын гүйцэтгэгч нар шалгарч, ажлаа эхэлж байсан билээ.

Ажлын хэсгийн хуралдаан

Мөн 2019 оны Монгол Улсын төсөвт нийт 44 сургууль, цэцэрлэгийн барилга барих хөрөнгө батлагдаж байснаас 19 байршилд газрын асуудал шийдвэрлэгдээгүй, үлдсэн сургууль, цэцэрлэгийн барилга нь зураг төсөвгүй байсан. Ажлын хэсгийн хуралдаанаар асуудлуудыг шуурхай шийдвэрлэсний үр дүнд зөвхөн 1 цэцэрлэгийн газрын асуудлыг шийдвэрлэж чадалгүй батлагдсан хөрөнгөө Улсын төсөвт буцаан төвлөрүүлсэн. Үлдсэн сургууль, цэцэрлэгийн барилгын угсралтын ажил эхлээд байгаа юм.

Ажлын хэсгийн хуралдаан

Түүнчлэн энэхүү Ажлын хэсгийн хуралдаанаар гадаадын зээл, тусламжийн хөрөнгөөр нийслэл хотод хэрэгжиж буй бусад боловсролын салбарын хөрөнгө оруулалтын төсөл, арга хэмжээнд тулгамдаж буй олон асуудлуудыг хэлэлцэн шийдвэрлэж байна.

  • 2020 оны Монгол Улсын төсөвт 31, нийслэлийн төсөвт 37 сургууль, цэцэрлэгийн барилга шинээр барих хөрөнгө батлагдсан.

НЗДТГ-ын Хөгжлийн бодлого, төлөвлөлтийн хэлтсийн Ахлах мэргэжилтэн Ж.Эрдэнэчимэг, Нийслэлийн Хот байгуулалт, хөгжлийн газрын орлогч дарга Ч.Бум-Эрдэнэ, Хот дахин хөгжүүлэх хэлтсийн Архитектор Н.Болор, мэргэжилтэн Б.Хонгорзул, Нийслэлийн Газар зохион байгуулалтын албаны Газар чөлөөлөх хэлтсийн дарга Д.Энхтөр, Ахлах мэргэжилтэн Б.Мягмарсүрэн, Нийслэлийн Хөрөнгө оруулалтын газрын Зураг төслийн хэлтсийн дарга Б.Лхагважав, мэргэжилтэн М.Эрдэнэбаяр, Нийслэлийн Худалдан авах ажиллагааны газрын хэлтсийн дарга Б.Түмэнжаргал, С.Батбаатар, Нийслэлийн Боловсролын газрын хэлтсийн дарга Ж.Энхтөр нар Нийслэлийн Боловсролын салбарт батлагдсан хөрөнгө оруулалтын төсөл, арга хэмжээг эрчимжүүлэх, тулгамдаж буй асуудлыг шуурхай шийдвэрлэх, бодит үр дүн гаргахын тулд үр бүтээлтэй ажиллаж байна.