Улсын их хурлын гишүүдийн хурууны үзүүрт улс орны эрх ашиг явж байдаг гэхэд болно. Тиймээс кнопоо ямар үнэ цэнтэй, шударга байлгах тухайн гишүүний ухамсраас ихээхэн хамаарна.

Шуналаа дарж чадахгүй нь кнопоо арилжиж халаасаа түнтийлгэж байхад албан тушаал горилсон, амбицаа дарж зарим нь тохироо нэрийн дор ханш тогтоож даналзана. Яг яах гэж парламентын гишүүн болсноо ухаарах сөхөөгүй арилжаа, тохироо хийсээр нэг л мэдэхэд дөрвөн жил харавсан сум шиг өнгөрдөг. УИХ-ын гишүүний саналын кнопын ханш өнөөдрийг хүртэл “ханш” нь тогтвортой бус явж иржээ.

Өнгөрсөн 20 гаруй жилийн авлигын жишээнээс харахад манай улстөрчид гарын үсэг, долоовор хуруугаа голдуу жип машинаар л үнэлдэг бололтой юм. 2017 онд улсын хэмжээнд “Таванбогд”, “Мөнххадаа” -гийн борлуулсан цоо шинэ Ланд жипний тоо 2200 байна. Шинэ жипний үнэ дунджаар 200 сая төгрөг. Үүнээс арай хямд, бүр илүү үнэтэй ч бий.

Улс орны эрх ашиг долоовор хуруу, гарын үсэг ингэж хямдхан үнэлэгдсээр байвал бид хаашаа явах вэ? Энэ удаагийн парламентад саналын кноп, хурууны өндөгний даралтанд улс орны эрх ашиг, бүрэн бүтэн байдал, тусгаар тогтнол, ард түмний амьдрал ахуй тэр чигтээ багтаж байгааг ухаарсан хүн тун цөөхөн. Саяхан DM цахим нэгдлээр нэгэн дүгнэлтийг хийжээ. 2016-2020 оны парламентын гишүүдээс 7-хон гишүүн улс орны эрх ашигтай шууд холбоотой асуудалд эерэг кноп дарсан гэж мэдэгджээ.

Л.Оюун-Эрдэнэ, Ц.Даваасүрэн, Л.Энхболд, Ц.Гарамжав, Т.Аюурсайхан, Х.Болорчулуун, А.Сүхбат нарын гишүүд долоовор хурууныхаа даралтыг эерэг байлгаж чадсан гэнэ. Ингэснийхээ төлөө өнөөдрийг хүртэл хэвлэлээр балбуулж, сайн муу олон нэрийг зүүж явна. Тэдний дотор ганц эмэгтэй гишүүн байгаа нь Ц.Гарамжав. Эмэгтэй хүний хувьд ийм шийдвэр гаргана, хэвлэлээр балбуулна гэдэг асар их золиос, тэсвэр тэвчээр шаардана. Тэдний эерэг буюу улс оныхоо эрх ашгийн төлөө кнопоо дарсан асуудлыг дурдвал,

- Эрдэнэтийн 49 хувь,
- Олон улсын гэрээний тухай асуудал
- Ж.Эрдэнэбатын Засгийн газрыг огцруулах асуудал
- 340,000 тонн нүүрсний хулгай
- Эрдэнэтийн 51 хувийн асуудал
- Стратегийн ордуудын өгөөжийг иргэдэд хүртээх
- М.Энхболдыг УИХ-ын даргаас унах асуудал
- Оюутолгойн санхүүжилтийг монголын банкуудаар дамжуулах асуудал
- Хөгжлийн банкны 1,3 их наяд төгрөгийн луйврын асуудал гээд хөвөрнө. Ийм шийдвэр гаргалцсаныхаа төлөө юу туулж байгааг өнгөрсөн хугацаанд харж байна.

УИХ-ын гишүүдийн кноп ямар үнэтэй вэ?