АН-ын дарга С.Эрдэнэ Ардчиллын С.Зориг агсны хөшөөнд төрсөн өдрөөр нь хүндэтгэл үзүүлэн намын журмын нөхдүүдийн хамт цэцэг өргөв.

Цэцэг өргөх үеэр АН-ын дарга С.Эрдэнэ “С.Зориг өнөөдөр амьд байсан бол 58 нас хүрэх байлаа. Ид хийж бүтээх нас нь байв. Энэ хүний үйл хэрэг өдгөө 30 жилийн ойтойгоо золгож байна. Ардчилсан хувьсгал, Ардчилсан нам байгуулагдсан 30 жилийн ойтой энэ хүний 58 насны өдөр давхцаж байгаа юм. 1990 оны ардчилсан хөдөлгөөнийг манлайлж, эмх цэгцтэй, аюулгүй байдлыг хангаж зохион байгуулж Монголын түүхэнд хувьсгал хийсэн. Энэ чадвар хүн бүрт заяахгүй. Түүний үйл хэрэг цаашид ч цэцэглэж Монгол Улс улам хүчирхэг улс болж хөгжинө гэдэгт эргэлзэхгүй байна” хэмээв.

Ингээд нийгэмд өрнөөд байгаа Цагдаагийн хурандаа Ч.Чинбатын сэтгүүлчийн биет халдсан уйваагүй үйлдлийн талаар хэвлэлийнхэнд хандан өөрийн үгээ хэлжээ.

Тэрээр, “Энэ онд (нарийн яривал сүүлийн гурван жил) түүхэндээ хамгийн олон сэтгүүлч хууль хяналтын байгууллагад дуудагдаж, эрүүгийн болон зөрчлийн хариуцлага хүлээжээ.

Хэвлэлийн эрх чөлөө бол Ардчиллын суурь үнэт зүйлсийн нэг.
Тиймээс ч Ардчилсан нам хэвлэлийн эрх, эрх чөлөө, сэтгүүл зүйн талд тууштай зогсох болно” гэв.