УИХ-ын гишүүн Х.Нямбаатар нарын таван гишүүн өнгөрсөн онд Прокурорын байгууллагад хүргүүлсэн 23 томоохон хэрэгт авч буй арга хэмжээний явцын талаар мэдээлэл авлаа.

УИХ-ын гишүүн Х.Нямбаатар “2019 оны дөрөвдүгээр сарын 17-ны өдөр авлига, албан тушаалын 23 хэргийг хуульд заасан хугацааны дагуу яаралтай шийдвэрлээч гэдэг албан бичиг хүргүүлсэн. Мөн эдгээр хэрэг ямар шатагдаа явж байгаа талаар Улсын Ерөнхи прокурортой уулзаж дэлгэрэнгүй мэдээлэл авлаа. Уг хэрэг нийт 40 хэрэг болж задарсан байна.

Тодорхой төрлийн хэргүүд тав, зургаан хэрэг болж задарсан байна. Зарим хэргүүд хэрэг бүртгэх мөрдөн байцаалтын шатанд явж байна. Тухайлбал, Тавантолгойн бүлэг орд газраас 368 мянган тонн нүүрс хулгайд алдагдсан талаарх хэргийн шинжээчийн дүгнэлт гарсан байна. Уг хэрэг хэрэг бүртгэх мөрдөн байцаах шатны ажиллагаанд явагдаж байгаа юм байна. Мөн зарим хэргүүд шүүхэд шилжсэн гэсэн мэдээлэл өгсөн.

Одоогийн байдлаар улсад учруулсан хохирлоос нийт 54 тэрбум төгрөг нөхөн төлөгдсөн байна. Бусад нууцтай холбоотой мэдээллийг өгөхөөс татгалзсан" гэлээ.

Энэ үеэр ЗГХЭГ-ын дарга Л.Оюун-Эрдэнэ "УИХ-ын гишүүнээр ажиллаж байх үедээ Эрдэнэт тойрсон бидний томъёолсноор банк болон уул уурхайн компаниуд, нам дамнасан МАНАН бүлэглэлийн талаар ЗГХЭГ-ын даргаар ажилласнаас хойш сайн ойлгож авлаа. Магадгүй би хамгийн их мэдээлэлтэй эхний таван хүний нэг байж магадгүй. Энэ бүлэглэлтэй хэн хэн холбоотой юм бол гэж их боддог байсан. Гэвч нэг жилийн дараа энэ бүлэглэлтэй хэн нь холбоогүй үлдсэнийг хайх түвшинд хүрсэн гэдгийг мэдсэн. Олон асуудал болсон. Сонгууль дөхсөн учраас сүржигнэж ярихгүй. Энэ талаар Үндэсний аюулгүй байдлын зөвлөл, ХЗДХ-ийн сайдад бичгээр мэдэгдсэн. Нэг өдөр илрэх байх гэж найдаж байна.

Эрдэнэттэй холбоотой асар их луйвар байна. Оффшор компаниудаар дамжин Монголд ирээд хаана хаана үл хөдлөх хөрөнгө болсон бэ гэдэг нь онцгой дэглэмийн үед ил болсон. Энэ талаарх мэдээллийг хууль хяналтын байгууллага, Засгийн газарт шилжүүлсэн.

Тодруулбал, Эрдэнэт үйлдвэрээс зэс олборлоод хил дээр аваачин гангийн үйлдвэр рүү очих хүртэлх гурван үе шаттай тээвэрлэлт бий. Энэ зардлыг нэгтгээд Лондонгийн биржээс зэсийн үнэ багцаагаар 31 төгрөг байна ч гэдэг юм уу, ийм байна гэж олон улсын жишиг үнэ зарладаг. Гэтэл Эрдэнэт үйлдвэрээс гарсан үнэ нь 123, 130 төгрөг болчихдог. Хамгийн их өсөлттэй байсан хугацаа нь Ц.Элбэгдоржийн үе. Түүнийг төрийн тэргүүнээр ажилласан найман жилийн хугацаанд Эрдэнэт үйлдвэрийн захирлууд нэгдүгээр гарын үсгээ өөрсдөө зурж чадахгүй хэмжээний эрсдэл үүссэн.

Ц.Элбэгдорж найзуудын сүлжээгээрээ дамжуулан энэ ажлыг хийсэн. Энэ хэрэг шалгагдах болов уу гэж бодож байна. Бидний зүгээс өнгөрсөн нэг жилийн хугацаанд шалгагдсан шалгалтын дүнг хуулийн байгууллагууд руу өгсөн. Эрдэнэт үйлдвэр нэг их наяд төгрөг төвоөрүүлсэн гэдэг нь ерөөсөө л энэ. Үүнээс болж Эрдэнэт үйлдвэрийн хувьчлалтай холбоотой асуудал яригдаж, үүнийгээ хамгаалахын тулд хууль хяналтын байгууллагын удирдлагыг томилдог. Улмаар хоёр намд байгаа нөлөө бүхий 15 хүнийг худалдаж авдаг систем рүү сүүлийн 15 жилийн хугацаанд орсон хөдлөшгүй баримтаар ил болсон” гэдгийг онцлов.

Х.Нямбаатар: Авлига, албан тушаалын 23 хэргээс 54 тэрбум төгрөг улсад нөхөн төлөгдсөн