2020.07.08

Х.Болорчулуун: ХХААХҮ-ийн сайд салбартаа маш их анхаарч ажиллах шаардлагатай

УИХ-ын чуулганы өнөөдрийн \2020.07.08\  нэгдсэн хуралдаан эхэллээ. Хуралдаанаар монгол Улсын Засгийн газрын бүрэлдэхүүн, сайд томилох асуудлыг  хэлэлцэж байна.

Хэлэлцэж буй асуудалтай холбогдуулан УИХ-ын гишүүд үг хэлж, асуулт асууж байна.

УИХ-ын гишүүн Х.Болорчулуун:

“Монгол Улсын Ерөнхий сайд Үндсэн хуульд заасан эрхийн хэмжээнд кабинетын сайд нараа оруулж ирлээ. Мэдээж сайд нарын нэрс орж ирж байгаа байдал, бүх хүнд, гишүүдэд 100% таалагдахгүй нь ойлгомжтой. Гэхдээ өмнөх зарим сайд нарыг томилж байсан мөнгөний хөшүүргэтэй биш тухайн салбартаа мэдлэг чадвартай хүнийг сонгон оруулж ирсэн гэж харагдаж байна.

ХХААХҮ-ийн сайдын хувьд салбарын мэргэжлийн хүний хувьд асуух зүйл байна. Энэ салбарын сайд хүн хөдөө нутагт өссөн, адуу малд ойр гэдгээр нь харж болох ч энэ салбарын үндсэн мэргэжлийн мэргэшсэн хүн биш байна. ХАА-н салбар Монгол улсад доголдсон байгаа. Өсөж төрсөн нутагтаа амьдарч чадахгүй нийслэл рүү нүүж байна. ХАА-н салбараа эдийн засгийн утгаар нь ашигтай хөгжүүлэх үүднээс энэ сайдад итгэл хүлээлгэсэн болов уу гэж бодож байна.

Дэлхийд ХАА-г эрсдэлтэй, тохиромтой, тааламжтай гэж ангилдаг. Манай улс эрсдэлтэй ангилалд орж байна.  Цаг агаарын эрс тэс уур амьсгалтай. Гэтэл тааламжтай ангилалд байдаг улс орнууд ч хөдөө аж ахуйн салбартаа татаас өгч хөгжүүлдэг, дэмждэг. Хүнсээр дамжуулж тухайн улс орны үндэсний аюулгүй байдал хангагддаг. Тиймээс улс орнууд энэ салбартаа анхаарч, дэмждэг. Бид ингэж байж хөгжүүлнэ. Одоогоор чадахгүй, импортоор авсаар л байна. Хууль гарсан. Намараас дотоодын үйлдвэрлэлээ хамгаалах байх. Салбарын сайд энэ чиглэлд юу хийх вэ?

УИХ-ын БОХХААБХ-ны гишүүд сайн зүйлийг дэмжинэ. Саар ажиллавал хуулийн хүрээнд хяналт тавьж, чиглэл өгч ажиллах болно. Баяр хүргэе.”