УИХ-ын чуулганы өнөөдрийн \2021.01.07\ нэгдсэн хуралдаанаар Монгол Улсын Үндсэн хуулийн цэцийн 2020 оны 12 дугаар дүгнэлтийг хэлэлцлээ.

Монгол Улсын Үндсэн хуулийн цэцийн 2020 оны 12 дүгээр дүгнэлттэй холбогдуулан УИХ-ын гишүүн С.Одонтуяа санал хэллээ.

УИХ-ын гишүүн С.Одонтуяа:

Миний хувьд Монгол улсын цагаатгалын комиссын даргаар ажиллаж байна.Улс төрийн нөлөө орсноос болж их хэлмэгдүүлэлт болсон байдаг.Монгол улс 31 мянган гаруй хүнээ цагаатгасан. Эрүүгийн хуулийн эрхзүйн байдлыг дордуулах замаар буцаан хэрэглэх нь хууль ёсны хэлмэгдүүлэлт үүсэх үндсийг тавина. 2017 онд алдаа гаргаад дахиж үүнийгээ засахын тулд бантан хутгаад эргээд Үндсэн хуулийн цэцийг буруутгах шаардлага байхгүй.

Түрүүний жишээг тайлбарлая. Хурашовын үед валютын арилжаа эрхэлсэн гэж хэсэг залууст 8 жилийн ял өгөөд, шоронд байх хугацаанд нь дахиад онцгой тохиолдлоор гээд 15 жил нэмээд ахиад хуулиа чангатгах замаар цаазаар авч байсан ийм жишээ байгаа. Энэ бол дэлхийн шившиг болсон жишээ.

Монгол улс цаашдаа ийм байдалд орохгүйн тулд энэ асуудлыг хариуцлагатайгаар авч үзэх хэрэгтэй. Авч үзэхдээ хүний эрхийн маш ноцтой зөрчил болно шүү гэдгийг Монгол улсын нэр бүхий хуульчид гаргаж тавьсан. Би ХЭҮК-ын гаргасан шийдвэрийг хүндэтгэж үздэг. Энэ хүмүүс энэ чиглэлийн мэдлэг боловсролтой хариуцлагатай хүмүүс. Тэд Цэцтэй адил шийдвэр гаргасан.

Авилга, албан тушаалын хэрэг гэдэг дээр анхаарлаа тавиад зарим хүмүүс үүнийг хүлээж авбал авилгыг дэмжинэ гэж хардаг. Би авилга, гэмт хэргийг дэмждэггүй. Үүнийг өөгшүүлсэн заалтыг өмнөх парламент гаргаснаараа маш том алдаа болсон. Маш олон авилгачдыг хөөн хэлэлцэх хугацаагаар хэргийн хэрэгсэхгүй болгосон. Эргээд засах гээд хүний эрхийг зөрчсөн заалт оруулж ирэх гэж байгаад эмзэглэж байна.

УИХ-ын гишүүн Ц.Сандаг-Очир:

Авилгатай тэмцэх талаар нилээн чангарч ялын бодлого чангарсан. Нэг бог хулгайлсан хүн 5 жилийн ял авахаар байгаа. Харин Монгол улсын газрын баялаг, нийгмийн баялгаас хулгайлсан нөхдүүд хөөн хэлэлцэх хугацаа гэсэн нэрийн дор хэргээ хэрэгсэхгүй болох асуудал байгаа.

Сэтгүүлч

Сэтгүүлч Ц.Соёлмаа soyolmaa@vip76.mn