УИХ-ын чуулганы өнөөдрийн \2021.03.26\ нэгдсэн хуралдаанаар Улсын Их Хурлын гишүүн Т.Доржхандаас "Коронавируст халдвар /Ковид-19/ цар тахлын улмаас гадаадад гацсан иргэдийг эх орондоо ирэх нөхцөлөөр хангах, бодит дэмжлэг үзүүлэх талаар" Монгол Улсын Ерөнхий сайдад тавьсан асуулгын хариуг сонслоо.

Асуулгын хариултыг Гадаад харилцааны сайд Б.Батцэцэг танилцуулсан бөгөөд асуулгатай холбогдуулан УИХ-ын гишүүд асуулт асууж, санал хэллээ. 

УИХ-ын гишүүн С.Одонтуяа:

"Өнөөдрийн асуулга нь нийтлэг ковид-19-ийн талаар бус цар тахлын улмаас гадаадад гацсан иргэдийг эх орондоо ирэх нөхцөлөөр хангах, бодит дэмжлэг үзүүлэх талаар юм байна. 

Сүүлийн үед олон нислэг явж байна. Мэдээлэл иргэдэд хангалттай хүрч байгаа. Өмнө нь УОК маш их цаг алдсан. 2020 оны 6 сард дулаан байхад бүх иргэнээ аваад ирье гэж олон санал гаргасан ч дэмжээгүй. Гадаадад байгаа иргэдээ маш их хохироосон, хүний эрхийн зөрчил дээд цэгтээ тулсан, амь насаа алдсан. Захиа бичээд хариу өгөхгүй байна гээд иргэд сууж байсан. Олон хоног буцалсан усаар амиа зогоож, машиндаа амьдарсан иргэн байсан. Гадаадад байгаа иргэдээ бүтэн жил нохойноос дор байлгасан. Үүний хохирол хариуцлагыг хүн хүлээх үү? үгүй юу? Иргэдээс маш их гомдсон захидал ирсэн. Бид иргэнийхээ үүргийг биелүүлж татвараа төлдөг байсан. Чагаад биднийг авахгүй, хаяад байгаа юм бэ? гэж. 

Та бүхэн сайн мэдэх байх нэгэн кинонд эх орон руугаа гүйж буй мэтээр элчин сайдынхаа яам руу гүйсээр байгаад орж аврагдаж байсан. Гэтэл элчин сайдын яамдууд маш хүнд нөхцөлтэй байсан шүү. Үүн дээрээ холбогдох байгууллагууд анхаарч ажиллах ёстой.

Түүнчлэн бодит дэмжлэг их бага байна. Би тодорхой санал хэлье. 300 сая иргэдийн хандив гэдэг бол нэг жийпний үнэ. Гэтэл Засгийн газар өдөрт хэдэн мянгаар нь жийп оруулж ирж унаж байгаа шүү дээ. Одоо дахиад 300 сая төгрөг нэмээд төсвөлчихөж болох уу? одоо ирэх иргэдэд энэ мөнгө хүрэлцэнэ. Сайдын хэлж байгаагаар 104 сая байгаа гэж байна. Үүнийгээ та хэмнэх хэрэггүй. 3 саяар нь 30 хэдэн хүнд өгчих боломжтой. Үүн дээр Шадар сайд дэмжиж өгнө үү.

Цар тахал маш хүнд байна. Би УИХ--ын даргын дэргэдэх зөвлөл дээр хэлсэн. нөөц, боломж байгаа юм уу? Өмнө нь бөаахан сүржигнэсэн хэрнээ өнөөдөр 400 гаруй тохиолдол илрээд байхад УИХ, гишүүд нь ч чив чимээгүй, юу ч болоогүй мэт сууж болохгүй. Маш яаралтай арга хэмжээ авах хэрэгтэй байна."

Сэтгүүлч

Редактор Ц.Соёлмаа soko@vip76.mn