УИХ-ын дарга Г.Занданшатарын захирамжаар Засгийн газраас өргөн мэдүүлсэн Зөвшөөрлийн тухай хууль, Зөвшөөрлийн жагсаалт батлах тухай хуулийн төсөл болон хамт өргөн мэдүүлсэн бусад төслүүд, УИХ-ын гишүүн С.Бямбацогт нарын 22 гишүүнээс өргөн мэдүүлсэн Зөвшөөрлийн тухай хуулийн шинэчилсэн найруулгын төсөл болон хамт өргөн мэдүүлсэн бусад хуулийн төслүүдийг нэгтгэн нэгдсэн хуралд бэлтгэх ажлыг хэсгийг шинэчлэн байгуулсан байна.

Шинээр бүрдсэн ажлын хэсэг дээрх хуулийн төслүүдийг тус тус нэгтгэн Нэгдсэн хуралдаанаар хэлэлцүүлэх бэлтгэл ажлыг хангах, санал, дүгнэлтийн төсөл боловсруулах аж. Ажлын хэсгийн ахлагчаар УИХ-ын Х.Ганхуяг ажиллахаар болжээ. Тус ажлын хэсэгт УИХ-ын гишүүн Х.Булгантуяа, Д.Өнөрболор, Б.Пүрэвдорж, Б.Энхбаяр нар багтсан байна.

МҮХАҮТ-аас Ковидын дараах эдийн засгийн “Их сэргэлт” санаачилгыг дэвшүүлсэн. Уг санаачилгын хүрээнд Зөвшөөрлийн тухай хуулийг батлан гаргаж, зөвшөөрлийн тоог цөөлөх, зөвшөөрөл олгох үйл явцыг хялбаршуулах, ил тод болгох санал гаргаж, УИХ, Засгийн газарт хүргүүлсэн юм.

Танхимын зүгээс Зөвшөөрлийн тухай хууль эрх зүйн орчинтой холбогдуулан бизнес эрхлэгчдийн саналаа Засгийн газар, УИХ-ын Байнгын хороонд тухай бүрд нь хүргүүлж байсан. Тодруулбал, Зөвшөөрлийн тухай хуулийн шинэчилсэн найруулгын төслийг хэлэлцүүлгийг зохион байгуулж байв. Мөн Зөвшөөрлийн тоог бууруулах ажлын хэсэгт орж ажиллаж байсан билээ.

2016 оны байдлаар Монгол Улсын хэмжээнд 54 байгууллага 914 төрлийн зөвшөөрөл олгож байна гэсэн судалгаа бий. Энэ нь бизнес эрхэлж, үйл ажиллагаа явуулж буй аж ахуйн нэгжүүдэд дарамт учруулж ирсэн. Зөвшөөрөлтэй холбоотой зарим харилцааг шинээр зохицуулах шаардлага ч гарч буй.

Засгийн газрын мөрийн хөтөлбөрт зөвшөөрлийн тоог гурав дахин бууруулах, давхардсан хяналт шалгалт, хүнд суртлыг арилгах, зөвшөөрөл хүчинтэй байх хугацааг сунгах, шат дамжлагыг багасгах зэрэг заалтууд тусгагдсан.

УИХ-ын гишүүн, дээрх хуулийн төслийн ажлын хэсгийн ахлагч Х.Ганхуяг “Зөвшөөрлийн тухай хуулийг шинэчлэн баталснаар авлига, хүнд суртлыг хумих төдийгүй бизнес эрхлэх орчныг сайжруулах, чөлөөт өрсөлдөөнийг бий болгох зэрэг олон давуу тал үүснэ” хэмээн онцолжээ.

Зөвшөөрлийн тухай хуулийг хэлэлцэх Ажлын хэсгийг шинэчлэн байгуулжээ

Зөвшөөрлийн тухай хуулийг хэлэлцэх Ажлын хэсгийг шинэчлэн байгуулжээ