Монгол Улс нийт 39 боомт байгаагаас 28 боомт үйл ажиллагаа явуулж байна. Үүнээс ОХУ-тай автозам болон төмөр замын 16 боомт, БНХАУ-тай 17 боомтоор хиллэж байна.

Монгол Улс эдгээр боомтуудын нэвтрүүлэх хүчин чадал, дэд бүтэц, үндэсний логистикийн сул байдал, манай улсын гадаад худалдаа, эдийн засгийн хөгжлийг хазаарлаж буйг үндэслэн эдийн засгийг эрчимжүүлэх, тэлэх зорилгоор Засгийн газрын Шинэ сэргэлтийн бодлогын тэргүүнд “БООМТЫН СЭРГЭЛТ”-ийг тодорхойлж, экспорт импортыг зохистойгоор нэмэгдүүлэх, хөрш орны хил залгаа боомтын Хөгжлийн ерөнхий төлөвлөлттэй уялдуулан тодотгоход анхааран ажиллаж байна.

Л.Оюун-Эрдэнэ Монгол Улсын Ерөнхий сайд

“Шинэ сэргэлтийн бодлого”-оос амжилттай хэрэгжиж буй ажлуудын тэргүүн эгнээнд боомтын сэргэлттэй холбогдох ажлууд эрэмбэлэгдэж байна. Боомтын хүчин чадлыг сайжруулан, худалдааны эргэлтийг нэмэгдүүлсэнээр Монгол Улс анх удаа 2023 онд 70 сая тонн нүүрс экспортоллоо.”

2023 он бол Боомтын сэргэлтийг сэдэлжүүлж, эхлүүлсэн, хөгжлийг түргэтгэсэн онцлох жил боллоо.

Боомтын сэргэлтийн хүрээнд Шивээхүрэн, Гашуунсухайт, Ханги, Бичигт, Замын-Үүд, Алтанбулаг, Сүхбаатар, Боршоо боомтуудад боомтын авто зам, төмөр зам, олон төрөлт чингэлэг тээврийн терминал, хил хяналтын байгууллагын ажилтан албан хаагчдын орон сууц зэрэг бүтээн байгуулалтын ажлыг өрнүүллээ. БНХАУ-тай хиллэж байгаа, байнгын ажиллагаатай 13 боомтоос 8 боомт, ОХУ-тай хиллэдэг байнгын ажиллагаатай 10 боомтоос 4 боомтод нь боомтын бүтээн байгуулалтын ажил хийж, сайжрууллаа. Мөн 2024 оноос Цагааннуур, Хавирга, Булган боомтуудад бүтээн байгуулалт, шинэчлэлийн ажлыг эхлүүлэх хөрөнгө оруулалтыг шийдвэрлэж ажиллалаа.

Монгол Улс боомтынхоо нэвтрэх чадавхийг хоёр дахин нэмэгдүүлснээр 2023 онд 70 сая тонн нүүрс экспортолсон нь цар тахлын өмнөх үе буюу 2019 оны мөн үетэй харьцуулахад экспорт 90 хувиар өссөн дүн үзүүллээ. Энэ нь Монгол Улсын гадаад худалдаа, экспортын хувьд түүхэн амжилт юм. Баянхошуу, Бичигт, Булган, Бургастай, Гашуунсухайт, Замын-Үүд, Ханги, Хавирга, Шивээхүрэн гэсэн нийт 9 боомтоор нүүрс экспортолж байна. Үүнээс Гашуунсухайт, Шивээхүрэн боомтоор авто зам, AGV буюу автомат удирдлагатай тээврийн хэрэгслээр, Замын-Үүд боомтоор авто зам, төмөр замаар, бусад 6 боомтоор нь дан авто замаар тээвэрлэлт хийж байна.

Боомт гэдэг бол зөвхөн гарц, орцын асуудал биш, стратегийн чухал ач холбогдол бүхий гол түшиц. Боомтуудаа хөгжүүлж тэлснээр дараагийн шат буюу аж үйлдвэржилтийг ярих боломж бидэнд бүрдэнэ. Цаашлаад эдийн засгийн чөлөөт бүс, хуурай боомтуудыг үе шаттайгаар байгуулснаар Монгол Улсын тээвэр логистикийн өрсөлдөх чадвар эрс дээшилнэ. Чөлөөт бүсийн хөгжлийн суурь болох дэд бүтцийн ажлыг бид урагшлуулж байна.

БООМТУУД СЭРГЭСНЭЭР ХУДАЛДАА, ЭДИЙН ЗАСГИЙГ ТЭЛЭХ БОДЛОГО ХӨРСӨНДӨӨ БУУЛАА