Ойрын өдрүүдэд Улаанбаатар хот орчмоор үргэлжилсэн бороотой байна. Бороотой өдрүүдэд хотынхныг нэгэн зовлон нөмөрдөг. Энэ нь гудмаарх нил усан дээгүүр харайх болон орон байр луу нь ус ороод ирэх вий гэсэн айдас. Тэгвэл энэ байдал хэзээ дээрдэх вэ.

Энэ талаар УИХ-ын гишүүн Г.Лувсанжамц өөрийн байр суурийг илэрхийлсэн. Түүний хувьд хот төлөвлөлтийн чиглэлээр Япон улсад докторын зэрэг хамгаалж, Монгол болон олон улсын хот төлөвлөлтийн тогтолцоог харьцуулан судалж, Ази, Европ, Латин Америкийн 10 гаруй улсад хот байгуулалт, бүс нутгийн хөгжлийн төсөлд зөвлөхөөр ажиллаж байсан туршлагатай юм. 

Тэрээр Улаанбаатар хотод сүүлийн жилүүдэд нэмэгдэх болсон үерийн шалтгаан болон шийдлийн талаар хэлэхдээ "Үер буух болсонд үндсэн хоёр зүйл нөлөөлж байна. Нэгдүгээрт, цаг агаарын өөрчлөлт. Цаг агаарын өөрчлөлтөөс шалтгаалж сүүлийн 10 жилийн хугацаанд аадар бороо ихээр ордог болсон.

Хоёрдугаарт, гэр хорооллын тэлэлт. Хотын хойд болон зүүн бүс рүү гэр хороолол их тэлж байна. Эдгээр зүгийн хөрсний шингээх чадвар нь багасаж байна. Гэр хороолол тэлэхийн хэрээр зүлэгжилт, ойжилт багасдаг. Ой модтой газар энгийн шороон хөрстэй газартай харьцуулахад ус шингээх чадвар нь хоёр дахин их байдаг. Хот тэлснээр ус шингээх газрын талбай багасаад социализмын үед барьсан үерийн далангийн систем болон шороожилтоос үүдэн ус их орж ирдэг болсон. Шалтгаанууд нь бол эдгээр.

Харин үүнийг шийдэхийн тулд үндсэн хоёр аргыг хэрэглэж болно гэж харж байгаа. Эхнийх нь Ерөнхийлөгчийн санаачилсан “Тэрбум мод” үндэсний хөтөлбөр. Энэ хөтөлбөрийг зөвхөн хөдөө орон нутаг гэхээсээ илүү зэрэгцүүлээд хотын ойролцоох голын ай сав газар Дунд гол болон Туул голын эх ундарга бүхий газар ойжуулалтыг хийх ёстой.

Тэгснээр нэг удаа орсон ширүүн борооны ус хот руу шууд урсаж орж ирэхгүй болж тухайн газартаа шингэж, илүү ногоон болно. Хоёрдугаарт, явган болон автозамын ус зайлуулах системийг хот даяар хийх. Энд авто болон явган хүний замын бүх төрөлд ус зайлуулах системийг хийж өгөх. Энэ зүйлсийг дунд болон урт хугацаандаа хийж болох зүйл гэж харж байна." гэлээ.