Байгаль орчин, хүнс, хөдөө аж ахуйн байнгын хорооны /2025.01.21/-ны өдрийн хуралдаанаар “Хүнсний хангамж, аюулгүй байдлыг хангах талаар авах зарим арга хэмжээний тухай” Улсын Их Хурлын 2022 оны 36 дугаар тогтоолын хэрэгжилтийн талаарх Хүнс, хөдөө аж ахуй, хөнгөн үйлдвэрийн сайдын мэдээллийг  сонслоо.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Ж.Батжаргал: 

Нэгдүгээрт, хүнсний хангамж, аюулгүй байдал, төлөвөлгөө гайгүй хэрэгжиж байгаа. ХАА-н салбарынханд талархалтай байгааг зориуд хэлэх ёстой. Анхаарах ёстой зүйлүүд байна. Бий болчхоод байгаа нөөц боломжуудыг хүнс болон баялаг болгоход илүү анхаарах ёстой. Сүүний бодлого ярихаараа зөвхөн шингэн сүүнийхээ бодлогын бүс нутаг ярьцгаагаад байна. Сүүн бүтээгдэхүүн гэж өчнөөн байна. Шингэн сүү болгож татаж авч чаддаггүй бүс нутгууддаа сүүн бүтээгдэхүүнийхээ үйлдвэрийг хөгжүүлье. Ингэснээр алсмал бүс нутгийн малчид, иргэдийг бид орлогожуулах ёстой. Нэгэнт байж байгаа бүтээгдэхүүний нөөцийг нь баялаг болгох ёстой. Энэ тал руу сайн анхаарч байж ХАА болон хүнс хөнгөн үйлдвэрийн салбарын хөгжил урагшилна.

Хоёрдугаарт, хүнс үйлдвэрлэл, тээвэрлэлт, хадгалалт борлуулалтын бүх түвшинд нь хяналт үнэлгээ шинжилгээгээ хийгээд, хаана ямар асуудал байгааг тодорхойлж, тэр технологийн үйл явц дээр нь стандарт хангалтаа хийх тухай асуудал юм. Хүнсний аюулгүй байдлаар дамжиж өвчлөл, хавдар өргөжиж байгаа залуужиж байгаа. Их ярьвал үйлдвэрлэлт болон экспортод "том цохилт" болно шүү. Тиймээс бодитой дүгнэлтийг гаргаж алдаа, оноо байгаа бол засаж залруулах ёстой. Энэ бол салбарын "амин сүнс" болсон асуудал. Манжин хүнийг аваад явчихдаг, хавдрыг үүсгэдэг эд гэсээр байгаад манжингийн тариалалтаа устгачихсан. Үүнийг хэн тогтоосон юм. Шинжлэх ухааны үндэслэлтэй нотолгоонд суурилсан нотолгоонуудаа гаргаж ирж засах залруулах ёстой. ХАА, хүнс хөнгөн үйлдвэрийн салбарт судалгаа хөгжүүлэлтийг эрс нэмэгдүүлмээр байна. Байгалийн өөрийнх нь өгөгдөл энерги гэж байдаг. Үүнийг нь түшиглэж үйлдвэрлэлээ явуулах. Тэгж байж нэгж бүтээгдэхүүний өртөг зардлыг хямдруулах тухай асуудал байдаг. Өвлийн хүлэмжийн тухай ярьцгааж байна. Олигтой үр дүнд хүрч өгөхгүй байна. Байгалийн дулааны эх үүсвэрийг нь ашиглаад говийн бүс рүү өвлийн хүлэмжийн суурьшуулбал яасан юм.

Сэтгүүлч

Сэтгүүлч Б.Хонгорсайхан