УИХ-ын гишүүн Д.Цогтбаатар өнгөрсөн долоо хоногт Женев хот дахь цөмийн физикийн суурь судалгааны олон улсын төв (CERN), олон улсын харилцаа, улс төр судлалын GESDA хүрээлэнд уулзалтууд хийлээ.

CERN-д физикийн суурь судалгааг дэлхийн том их сургуулиуд болон судалгааны төвууд хамтран хийх дэд бүтцийг бий болгон ажиллуулснаараа хүн төрөлхтний шинжлэх ухаан, түүн дотроо квантын, сансрын физикийн хөгжилд нэн өндөр түлхэц, хувь нэмэр оруулж байгаагаараа онцлогтой.

Энэ талаарх сэтгэгдэлдээ "Бүх техник технологи нь гэрлийн хурдыг баримжаалан ажилдаг тул сумны хурд зэргийг дэндүү удаанд тооцон авч хэрэглэдэг ч үгүй гээд бодоход л ямар өндөр нарийвчлалтайгаар ертөнцийн цөм рүү гүн нэвтэрсэн суурийн суурь судалгаа хийцгээж буй нь харагдах бизээ. Энд  онцолмоор нэгэн зүйл бол олон улсын шинжлэх ухааны энэ хүрээлэнг нээж ажиллулах санааг сэдэлцэж, суурийг нь тавилцсан эрдэмтдийн дунд нэг дипломатч, нэг философич байдаг нь өвөрмөц.GESDA хүрээлэн бол олон улсын харилцааны хөгжлийг судалгаа, шинжилгээний “шид”-ээр урьдчилан тооцоолох том зорилго бүхий эрдмийн төв юм. Тэнд хийгдэж буй олон судалгааны чиглэл дотроос олон улсын дипломат үйл ажиллагаа, харилцааг квантын технологитой уялдуулан судлах хөтөлбөрийг CERN-тэй хамтран хэрэгжүүлдэг нь миний сэтгэлд нэн ойр танил санагдлаа" гэжээ.

CERN-ээс Нобелийн олон шагналтан төрсний зэрэгцээ 2012 онд хамгийн эгэл бөөм болох Higgs Boson-ыг нээсэн нь субатомын физикийн судалгааг дахин нэг шатаар ахиулсан том үсрэлт болсон байдаг. Мөн энд л дэлхийг нэгтгэсэн шүлжээ - “www”-г сэдэж амьдралд нэвтрүүлсэн зэрэг амжилт бүтээлүүдээр баялаг юм.