УИХ-ын чуулганы өнөөдрийн /2025.04.04/ хуралдаанаар “Авлигатай тэмцэх газрын даргыг улируулан томилох тухай” Улсын Их Хурлын тогтоолын төслийг хэлэлцлээ.

Хэлэлцэж буй асуудалтай холбогдуулан гишүүд үг хэлж асуулт асуулаа.

УИХ-ын гишүүн Ж.Чинбүрэн:

Өнгөрсөн парламент, өнгөрсөн хамгийн отгон чуулганаараа бид эмийн түр хорооны нээлттэй сонсголыг сонссон. Эмийн түр хороог ахалж ажиллаж байхад нэгдмэл ашиг сонирхолтой этгээд гэдэг хуулийн заалтад 260 гаруй хүний нэр холбогдож эдгээр улсууд шийдвэр гаргах түвшинд нөлөөлж оролцсон эсэхийг шалгуулахаар АТГ-т хүлээлгэн өгсөн. Хариу аваагүй байна. Энэ асуудал ямар шатанд явж байна вэ?

260 гаруй хүний нэрийг хуулийн заалттай нь уяад харахад хамааралгүй олон хүн энд орсон. Миний АТГ-т өгдөг нь хамааралгүй хүмүүсийг цагаатгах хэрэгтэй. Нэгдмэл ашиг сонирхолтой гэдэг хуулийн заалт нь өөрөө маш өргөн утгатай байдаг. Харин яг шийдвэр гаргахад Эмийн зөвлөлд ажилласан уу? Тухайн компаниудын үйл ажиллагааг дэмжсэн үү? Тэр шийдвэр гаргахад би ашиг сонирхлын зөрчилтэй гээд тухайн хурлаас санал хураалтад оролцохгүй гээд гарч явсан уу гэдэг асуудлыг л тодруулах гэж би АТГ-д өгсөн. Үүний явц ямар байна вэ? Эмийн түр хороо ажиллаад ЗГ-т тогтоол гаргаж арав гаран асуудлыг үүрэг даалгавар болгон өгсөн. Өнгөрсөн намрын чуулганаар хэлэлцэх ёстой байсан асуудлаа оруулж ирээгүй. Нийгмийн бодлогын байнгын хороогоор тайлангаа тавь гэдэг шаардлагыг өчигдөр ЭМ-ийн сайдад хэллээ. Тэгэхээр энэ үйл явцыг та дэлгэрүүлж хэлж өгөөч.

Түүний асуултад нэр дэвшигч З.Дашдаваа хариуллаа.