УИХ-ын чуулганы /2025.03.27/-ны өдрийн хуралдаанаар Амьтны тухай хуульд нэмэлт оруулах тухай хуулийн төслийн хэлэлцэх эсэхийг хэлэлцлээ. 

Уг асуудалтай холбогдуулан гишүүд асуулт асууж, хариулт авлаа.

УИХ-ын гишүүн Н.Алтаншагай:

Саарал чонын тоо толгойтой холбоотой асуудал яригдаж байна. 40 жилийн өмнө судалгаа хийгдсэн дүр зурагтай байгаа. Үүн дээр Байгаль орчны яамны зүгээс яг ямар бодит арга хэмжээ авах вэ?

Говийн болон Зүүн аймгуудын нутгаар талын саарал чоно үзэгдэхээ байсан. Үүн дээр ямар бодлого баримтлах юм. Цаашдаа чонын тоо толгойг хэрхэн хамгаалах юм. Экологийн сүйрэл авчрах магадлалтай. Чоно байгаль дээр байгаа зэрлэг амьтны мууг нь барьж, ан ав хийдэг. Нэг ёсондоо байгалийн цэвэрлэгч амьтан. Нүүдэлчин малчид байгаль, эх дэлхий, ан амьтантайгаа дасан зохицоод өдийг хүрсэн. Чонын тоо толгой сүүлийн үед өссөн гээд байгаа нь ковидтой холбоотой байж магадгүй. Хөл хорионы үе буюу 1-2 жилд гөлөг суйлах ажиллагаанууд нь зогссон байх магадлалтай. Үүнээс болоод өссөн байж магадгүй. Тиймээс эргээд хяналтаа хэрхэн, яаж тавих юм. Хэт задгайд нь тавиад амьтны аймгийг хоморголон устгах байдал руугаа орчих вий! 

Чонын тоо толгойг эргэж харах, судалгаа шинжилгээ, эрдэм шинжилгээний чиглэлээр ажил хийх нь зөв. Иймд саарал чоно, говь хээрийн чонын тоо толгой дээр бодит мэдээлэл өгнө үү.

Түүний асуултад, Байгаль орчин, уур амьсгалын өөрчлөлтийн сайд С.Одонтуяа хариуллаа.

Сэтгүүлч

Сэтгүүлч Б.Хонгорсайхан