Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэл тайланг хэлэлцээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Ц.Идэрбат

3 жилийн өмнө Монгол Улс жилд 20 сая арьс гаргасны 50 хувийг нь боловсруулдаг, үлдсэнийг нь хаядаг байсан. Эмээлтийн цогцолбор хэзээ ашиглалтад орох вэ, 20 сая арьсаа яах вэ. Малчид малын гаралтай бүх түүхий эдээ бүгдийг нь ашигладаг байсан бол өнөөдөр гулуузнаас бусдыг нь хаяж байна. Энэ тал дээр ямар байр суурь баримтлан ажиллаж байна вэ? Мөн Зүүн бүсийн 10 аймагтай холбоотой Дулааны станцын барилгын ажил 30-аад хувьтай явж байна. Цаашид хэрхэх вэ. Малчдын нийгмийн даатгалын асуудал тодорхой болсон уу?

Өнөөдөр манай улсад ноолуурын асуудал ид бужигнаж байх ёстой атал Зүүн бүсийн аймгуудаар жишээлэхэд нэг ч ченж тэнд алга. Энэ юутай холбоотой вэ? Дэлхийн ЗЗ-ийн үнэ ханш нөлөөлөөд байна уу, хөрш орны татварын бодлого уу гээд нэгдсэн ойлголт өгөхгүй бол буруу ойлгогдох вий. ХХААХҮЯ нөхцөл байдлыг зөв тодорхойлж, анхаарлаа хандуулаасай.

Өчигдрийн хуралдаанаар 1072 хувьцааны талаар ярьсан. 2016 онд үүнийг “Сайн хувьцаа” нэрээр олгож эхлэхдээ заримд нь ойлгуулж, зарим нь ямар ч мэдээлэлгүй байсан талаар иргэд ярьдаг. Эрдэнэс Тавантолгойн уурхай 16 жил тогтвортой ажиллахаар болоод байгаа. Хувьцааны талаар нэг чигтэй, нэгдсэн ойлголт өгөх шаардлагатай.

Түүний асуултад Ерөнхий сайд Л.Оюун-Эрдэнэ хариуллаа.