Улсын Их Хурлын Байгаль орчин, хүнс, хөдөө аж ахуйн байнгын хорооны өчигдрийн /2025.04.15/ хуралдаанаар Агаарын бохирдол, утааны асуудлаар ерөнхий хяналтын сонсголын бэлтгэлийг хангах, зохион байгуулах үүрэг бүхий ажлын хэсгийн тайланг хэлэлцсэн юм.

Тайлантай холбогдуулан гишүүд саналаа хэллээ.

УИХ-ын гишүүн П.Батчимэг:

Өнгөрсөн нээлттэй сонсголын үеэр утааны улмаас 2017-2024 оны хугацаанд нийт 779 иргэн угаартаж нас барсан гэсэн мэдээлэл тодорхой болсон. Гэвч эдгээр иргэдийн ар гэрт төрөөс нөхөн төлбөр олгосон, хохирлыг барагдуулсан талаар огт дурдагдаагүй билээ. Иймд угаартаж нас барсан иргэдийн ар гэрт нөхөн төлбөр олгох, хохирлыг барагдуулах асуудлаар холбогдох хууль тогтоомжид нэмэлт, өөрчлөлт оруулах шаардлагатай.

Мөн нээлттэй сонсголын үеэр Засгийн газраас агаарын бохирдлыг бууруулах Үндэсний хороог байгуулж, Байгаль орчин, уур амьсгалын өөрчлөлтийн сайдад хариуцуулсан. Гэвч агаарын бохирдлыг бууруулах асуудлыг салбарын яамны чиг үүргээр хязгаарлах биш Засгийн газрын тэргүүн, эсвэл Шадар сайд ахалдаг байх нь зүйтэй юм.

Утааны асуудлаар авч хэрэгжүүлсэн арга хэмжээний талаарх Засгийн газрын тайлан, мэдээллийг УИХ-ын намар, хаврын чуулганаар тогтмол сонсдог байх, ингэснээр төрийн албан тушаалтнуудын үүрэг хариуцлагыг нэмэгдүүлнэ.