Улс эх орны эдийн засгийг төр биш бизнес эрхлэгч аж ахуйн нэгжүүд үүрдэг.

Ковидын үе гэж нэрлэгдээд буй 2020-2022 оны үед дэлхий нийтээр эдийн засгийн зогсонги байдалд орж, улс орон бүр тодорхой зохицуулалтуудыг хийж байв. Монгол Улс ААН-үүдэд олгосон зээлийн эргэн төлөлтийг хойшлуулах арга хэмжээ авсан ч эргэн сэргэхгүй байсаар хаалгаа барьсан олон газар бий.

Бизнес эрхлэгч, бүтээн байгуулагчдын зүгээс төрөөс хүсэж буй ганцхан зүйл нь татварын хувь хэмжээг бууруулах, бүх нийтээрээ хамрагддаг байх юм.

Үүнийг түмэн олноо төлөөлөн хууль боловсруулахаар сууж буй Г.Уянгахишиг, М.Нарантуяа-Нара нарын гишүүд УИХ-ын гишүүний бүрэн эрхийнхээ хүрээнд өчигдөр /2025.09.19/ хуулийн төслөө боловсруулж эцэслээд УИХ-д өргөн барьсан юм.

Өнөөдрийн байдлаар ААН-үүдийн НӨАТ-ын өр 540 тэрбум буюу нийт өрийн 80 хувийг эзлээд буй.

Учир нь бизнес эрхлэгчдэд татвар, зээл, түрээсийн дарамт их. Аж ахуйн нэгжүүд орлогын албан татвар, нийгмийн даатгалын шимтгэл дээрээс нь нэмэгдсэн өртгийн албан татвар зэрэг олон төрлийн төлбөрийг төрд төлж байна.

Тиймээс ачааллаас хөнгөлж НӨАТ-ын хувь хэмжээг 5 хувь болгох боломжтой гэдэг санаачилгыг хууль санаачлагчид дэвшүүлсэн аж.

НӨАТ-ын орлого өсч, орлого цуглуулах чадвар нэмэгдэж байгаа хэдий ч үр дүнд нь инфляци, ажилгүйдлийн түвшин өсөх, ДНБ буурах эрсдэл үүсэж болзошгүй байгааг мэргэжилтүүд ярьдаг.

Хуулийн төсөл батлагдвал аж ахуй нэгжүүдийн үйл ажиллагаанд дэмжлэг болохоос гадна татвар төлөгчдийн бааз нэмэгдэж, эдийн засагт эерэг нөлөө үзүүлж, улсын төсөвт цугларах татварын орлого нэмэгдэх боломжтой болох юм.

Г.Уянгахишиг: НӨАТ-ын хувь хэмжээг 5 хувь болгосноор татвар төлөгчдийн бааз нэмэгдэж, төсвийн орлого нэмэгдэнэ