Өнөөдөр шатахуун сурагласан, ШТС-дээр оочир, дараалал үүссэн, хүндхэн байна.

Үүнийг шийднэ хэмээн өнгөрсөн баасан гаригт буюу /2025.12.12/-ны өдрийн Их хурлаар 92 гишүүний 69 нь буюу 75 хувийн саналаар дэмжиж, Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийг баталсан.

Манай улс газрын тосны бүтээгдэхүүний хэрэглээгээ 100 хувь импортоор хангаж байна. Улс орны нийгэм, эдийн засаг, уул уурхайн үйлдвэрлэлийн өсөлттэй холбоотойгоор манай улсын газрын тосны бүтээгдэхүүний хэрэглээ жил бүр өсөн нэмэгдэж, 2025 оны 9 дүгээр сарын 31-ний өдрийн байдлаар импортын хэмжээ 2.2 сая тонн болсон нь өмнөх оноос 21,0 хувиар өссөн үзүүлэлттэй байгаа аж.

Харин дээрх хууль батлагдсанаар газрын тосны бүтээгдэхүүний нийлүүлэлт, хангамж тогтворжиж, бүтээгдэхүүний хомсдолоос урьдчилан сэргийлэх, агуулахын хүчин чадал нэмэгдэх, агаарын бохирдол бууруулах, нийгэм, эдийн засгийн өсөлтийг дэмжих ач холбогдолтой хэмээн Аж үйлдвэр, эрдэс баялгийн сайд Г.Дамдинням онцлоод байгаа.

Энэхүү хуулиар Монголбанкнаас 500 тэрбумын репо санхүүжилтийг дотоодын шатахуун импортлогч компаниудыг шатахууны нөөцлүүрийн сав барихад зориулж зээлээр олгох бөгөөд 2031 он хүртэл хэрэгжинэ.

Дотоодод шатахууны өдрийн нөөц хурдан дуусаж, иргэдийн дунд дараалал үүсээд буй уг асуудлыг шийдвэрлэх ганц гарц нь энэхүү хуулийн төсөл хэмээн сайд нь тайлбарлаж, зүтгүүлсэн. Гэтэл УИХ-ын чуулган дээр уг хуулийн төслийг хэлэлцэх үеэр зарим гишүүдийн зүгээс ийм өндөр хүүтэй зээлийн санхүүжилтийг авах дотоодын шатахуун импортлогч компаниуд алга гэдгийг хэлж байв.Мөн зарим ААН-д давуу байдал үүсгэж буйг онцолж байлаа.

УИХ-ын гишүүн Б.Түвшин:

Шийдэл нь шатахуун агуулах сав барина гээд байдаг. Агуулах сав бариад, өргөтгөх гэсээр байтал хэдэн жил болж, ямар хугацаанд шийдэгдэх вэ, богино хугацааны шийдэл байж чадах уу. Ер нь агуулах савны дутагдлын асуудал биш. Савуудаа яаж дүүргэх ложистик тогтолцооны л асуудал юм байна.

УИХ-ын гишүүн А.Ариунзаяа:

Дэмжихэд хэцүү, дэмжихгүй байхад бүүр ч хэцүү ийм асуудлыг оруулж ирж байна. Шатахуун түлш нийлүүлэлт хүнд байна уу? Хүнд байна, бүгдээрээ л мэдэж байгаа. Тэгээд энэ хууль ААН байгууллагуудад давуу байдал үүсгэж байгаа л хууль. Хөнгөлөлттэй зээл олгож, эх үүсвэр бий болгох гэж байна. Ийм ч учраас Монгол банк үүнийг зохион байгуулж болохгүй.

Хууль батлагдлаа. Харин Монголчууд хэзээ шатахуунд оочирлохоо зогсоож, хувь хувьсгалын ажлаа санаа зоволтгүй төлөвлөж, хэвийн амьдралдаа шилжих вэ?

Шатахууны нөөцийг нэмэгдүүлэх хууль батлагдсан, ХЭЗЭЭ ШАТАХУУНД оочирлохоо болих вэ!