УИХ-ын чуулганы /2025.12.18/-ны хуралдаанаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төслийг хэлэлцүүллээ.

Хэлэлцүүлж буй асуудалтай холбогдуулан УИХ-ын гишүүн С.Бямбацогт асуулт тавилаа.

Зарчмын хувьд энэ хуулийн төслийг дэмжлээ. Учир нь Монголчууд бидэнд баяр багадаагүй, амралт цөөдөөгүй. Гагцхүү зөв зохицуулалт хэрэгтэй. АМРАЛТ, БҮТЭЭМЖ хоёрын харьцаа зохистой байх учиртай. Зүй нь, Улс тунхагласны өдөр, Монгол бахархлын өдөр, Бурхан багшийн дүйчин өдөр, Эмэгтэйчүүдийн баяр, Хүүхдийн баяр зэрэг баярын өдрүүд амралтын өдөр таарвал ажлын өдрийг нь амралтын өдөр болгон сунгаж амрах нь учир дутагдалтай.

Харин олон улсын жишиг, монгол орныхоо онцлог, өв уламжлал, ёс заншлаа бодсон ч бид Цагаан сар, Үндэсний их баяр наадмын өдрүүдэд арай жаахан урт амардаг байх нь зөв шийдэл. Цагаан сар бол манай ард түмний уламжлалт баяруудын нэг. Бусад улс оронтой жишээлэн авч үзэхэд, зам тээврийн осол бусад хүчин зүйлээс шалтгаалан хаврын баяр болохын урьд амрах байдлаар зохицуулсан байдаг.

Тиймээс манай улс ч ялгаагүй цагаан сарын битүүний өдрөөс эхлээд амарчихвал хөдөө орон нутаг руу зорчих иргэд маань яарахгүй, хотоос гарах гэж түгжрэл үүсгэлгүй явах боломж бүрдэнэ. Наадмын өдрүүдэд ч гэсэн нутагтаа очоод наадамлах, үр хүүхдээ агаар салхинд гаргах гэсэн хүмүүсийн цуваа ихэсдэг.

Тэгэхээр Цагаан сар болон наадмын баярын өдөр амралтын өдөртэй давхцаж байвал дараагийн ажлын өдрийг нь амралтын өдөр болгож сунгах, харин бусад баярын өдөр амралтын өдөр таарвал тэр өдрөө л баярлаад өнгөрдөг байх нь амьдралд ойрхон шийдвэр болно.

С.Бямбацогт: Амьдралд ойрхон шийдвэр хэрэгждэг