Монголын бизнес эрхлэгчид өнөөдөр 200 гаруй хуулийн хүрээнд үйл ажиллагаа явуулж байна.

Гадаадын хөрөнгө оруулалтыг хязгаарласан 40 гаруй зохицуулалт байгаа нь бизнесийн орчинд хүндрэл үүсгээд байгаа юм.

Үүний баталгааг Монгол Улсын хөрөнгө оруулалт, бизнесийн орчны үзүүлэлтүүдээс харж болно.

Дэлхийн 184 орноос

Эрх зүйт ёсны индекс 72
Бизнесийн эрх чөлөөний үзүүлэлт 85
Өмчийн эрхийн баталгаа 94
Хөрөнгө оруулагчдад ээлтэй байдал 109
Төрийн тогтвортой, зарчимт байдал 115-д эрэмбэлэгдэж байна.

Энэ бол Монголд бизнес эхлүүлэхэд олон шат дамжлага, хугацаа шаарддаг, хөрөнгө оруулагчийн эрхийг хамгаалах эрх зүйн орчин сул, бизнес эрхлэгч өмчөө хамгаалах баталгаагүй гэдгийг харуулж байна. Тиймээс ЭДИЙН ЗАСАГТ ЭРХ ЧӨЛӨӨ ОЛГОХ хуулийн төслийг Эдийн засаг, хөгжлийн яамнаас УИХ-д өргөн мэдүүлээд байна.

Энэ нь хөрөнгө оруулалт, бизнесийн үйл ажиллагаа эрхлэхтэй холбоотой хуулиудын малгай хууль болно. Ингэснээр бизнес эрхлэгчдийн эрх ашгийг хамгаалсан шийдвэр гаргах эрх зүйн боломжийг бүрдүүлж буй хэрэг.

Хууль батлагдсанаар

Бизнес эрхлэгч, хөрөнгө оруулагчдын бие махь бодь, хөрөнгөд халдах, үйл ажиллагааг нь тасалдуулахад чиглэсэн хууль бус арга хэрэгсэл ашиглахыг, хуульд заагаагүй хяналт шалгалт хийх, хуулиас давсан дүрэм журам батлахыг хатуу хориглох аж.

Бизнес эрхлэгчдийн эрх ашгийг хамгаалахад төр, хувийн хэвшлийн төлөөллийг оролцуулсан зөвлөлдөх механизмыг бүрдүүлж буйгаараа онцлогтой. Төрийн зүгээс зөвхөн бодлогоор дэмжих, төрийн чиг үүргийг хувийн хэвшилд шилжүүлэх замаар хамтран ажиллахаар тусгаж байгаа юм байна.

Түүнчлэн бизнес эрхлэх үйл ажиллагааг хөнгөвчлөх үүднээс төрийн үйлчилгээний шат дамжлагуудад шийдвэрлэх хугацааг тодорхой тусгаж, нийтдээ төрөөс олгож байгаа 120 тусгай зөвшөөрөл мэргэжлийн холбоодод шилжиж байна. Ингэснээр төр өөрт байгаа мэдээллийг иргэн аж ахуй нэгжээс дахин шаардахгүй буюу хүнд суртал арилах томоохон өөрчлөлтийг бий болгохоор зорьж байна.

Монгол Улсын тэргүүн Шадар сайд болоод Эдийн засаг, хөгжлийн сайд Ж.Энхбаяр мэдээлэл хийхдээ “Баялаг бүтээгчдийг дэмжих багц хуулийн хүрээнд боловсруулсан энэ хуулийн төсөл нь бизнесийн эрх чөлөөг дэмжиж, хувийн өмчийн халдашгүй байдлыг хуулиар баталгаажуулах зорилготой” гэдгийг онцоллоо.

Ж.Энхбаяр: Бизнесийн орчин дахь төрийн оролцоог багасгаж эдийн засгийн тогтвортой өсөлтийг хангана