Б.Жавхлан Монгол Улсын 38, 39, 40 дэх Сангийн сайдаар сүүлийн таван жилийн хугацаанд ажиллаж, өнөөдөр энэхүү нэр хүндтэй албыг УИХ-ын гишүүн, Монгол Улсын 41 дэх Сангийн сайд З.Мэндсайханд хүлээлгэн өглөө.

Б.Жавхлан: Өнгөрсөн хугацаанд улс орны эдийн засгийг сайжруулахын төлөө тулгарсан сорилт, бэрхшээл, алдаа оноо бүхнийг хамт олныхоо хамтаар даван туулж, макро эдийн засгийг үе шаттайгаар сэргээн, тогтвортой өсөлтийн замд хөтөллөө.

Төсөв, санхүүгийн бодлогын уялдааг ханган ажилласны үр дүнд улсын төсвийн орлогыг гурав дахин тэлж, дотоодын нийт бүтээгдэхүүнийг 44.7 их наяд төгрөгөөс 90.0 их наяд төгрөгт хүргэн хоёр дахин өсгөж чадсан нь бидний хамтын хөдөлмөрийн бодит үр дүн юм. 2026 онд энэ үзүүлэлт 100 их наяд төгрөгийг давах төлөвтэй байна.
Эдийн засгийн өсөлт 2022–2025 онд дунджаар 6.0 хувьд тогтворжиж, 2026 оны эхэнд 8.6 хувьд хүрсэн нь өсөлтийн эрч хадгалагдаж байгааг илтгэж байна. Инфляц сүүлийн гурван жил дараалан буурч, 2026 оны эхэнд 6.5 хувьд хүрч тогтворжлоо.

Гадаад валютын албан нөөц 4.3 тэрбум ам.доллараас өсөж, 2026 онд түүхэндээ анх удаа 7.2 тэрбум ам.долларт хүрсэн нь эдийн засгийн дархлааг бэхжүүлж чадлаа. Валютын ханш 3550 төгрөг орчимд тогтворжиж, санхүүгийн зах зээлийн тогтвортой байдлыг хадгалав.
Боомтын сэргэлтийн бодлогыг амжилттай хэрэгжүүлж, нүүрсний экспортыг 2022 оноос 2.8 дахин нэмэгдүүлэн 90 сая тоннд хүргэлээ. Мөн Оюутолгой төслийн зээлийн хүүг бууруулах хэлэлцээг эхлүүлж, байгалийн баялгийн өгөөжийг иргэн бүртээ хүртээх бодит боломжийг бүрдүүлэх ажлыг эхлүүлэв.
Ирээдүйн өв санг анх удаа мөнгөжүүлж, 6.1 их наяд төгрөгт хүргэлээ.
??Эдгээр бодлогын үр дүнд зээлжих зэрэглэл түүхэн дээд түвшинд хүрч, Монгол Улсын нэр хүнд олон улсын тавцанд бэхэжлээ.
Энэ бүх амжилтын ард нэг зорилгын төлөө тууштай зүтгэж, цаг наргүй хөдөлмөрлөсөн Сангийн яамны мэргэжлийн чадварлаг хамт олон байлаа. Та бүхний хичээл зүтгэл, харилцан итгэлцэл, ойлголцол энэхүү амжилтын үндэс суурь болсон.

Мөн бодлогыг маань ойлгож, дэмжиж, хамтдаа урагшилсан үе үеийн Засгийн газрын тэргүүн болон гишүүддээ чин сэтгэлийн талархал илэрхийлье!

Монгол Улсын 38, 39, 40 дэх Сангийн сайд Б.Жавхлан үүрэгт ажлаа хүлээлгэн өглөө