УИХ-ын чуулганы /2026.04.23/-ны өдрийн хуралдаанаар Эрхтэн, эд, эс шилжүүлэн суулгах тухай хуулийн төсөл болон хамт өргөн мэдүүлсэн хуулийн төслүүдийг хэлэлцлээ.

Тус хуулийн төслийг 2025.05.23-ны өдөр УИХ-аар хэлэлцүүлсэн. Улмаар Ажлын хэсэг 1 жилийн хугацаанд ажиллаад буй.

УИХ-ын гишүүн Б.Баярбаатар Эрхтэн, эд, эс шилжүүлэн суулгах тухай хуулийн төсөл болон хамт өргөн мэдүүлсэн төслийн байнгын хорооны санал, дүгнэлтийг танилцууллаа

Тэрбээр танилцуулгадаа ажлын хэсэг 17 удаа хуралдсан тухай дурдаад, хуулийн төслүүдийг хэлэлцүүлэгт бэлтгэхдээ Монгол Улсын Их Хурлын Тамгын газраас гаргасан хууль зүйн дүгнэлт, Монгол Улсын Хүний эрхийн Үндэсний Комисс, эрүүл мэндийн яам, Улсын Их Хурлын гишүүдээс ирүүлсэн саналуудыг үндэслэсэн гэдгийг онцолсон юм.

Ажлын хэсэг Эрхтэн, эд, эс шилжүүлэн суулгах тухай хуулийн төслийн үзэл баримтлалын хүрээнд зүйл, хэсэг, заалт нэг бүрээр ярилцаж, нэр томьёо, үг, хэллэгийг ойлгоход хялбар, энгийн, салаа утгагүй болгох, заримыг тайлбарлах, гадаад улсын иргэн, харьяалалгүй хүнд хамаарах зохицуулалт нэмэх, эсийн тухай тусдаа зүйлийг дэлгэрэнгүй тусгах, эд, эсийг хадгалах тусгай зориулалтын био банкны тухай зохицуулалтыг шинээр томьёолох, амьд донорт тавигдах шаардлага, амьгүй донорыг илрүүлэх, бүртгэх асуудлыг олон улсын жишиг, зарчимд нийцүүлэх, хүний болон хүний эрхтний наймааны эсрэг Истанбулын тунхаглалын зарчмуудыг тусгах, эрхтэн, эд, эс шилжүүлэн суулгах үйл ажиллагаанд оролцож байгаа эрүүл мэндийн байгууллага хоорондын уялдаа, чиг үүргийг тодорхой болгох агуулга бүхий зарчмын зөрүүтэй 66 саналын томьёоллыг бэлтгэсэн байна. Мөн хамт өргөн мэдүүлсэн хуулийн төслүүдтэй холбоотой зарчмын зөрүүтэй долоон саналын томьёолол бэлтгэжээ.

Эрхтэн, эд, эс шилжүүлэн суулгах тухай хуулийн төслийг хэлэлцлээ

Эрхтэн, эд, эс шилжүүлэн суулгах тухай хуулийн төслийг хэлэлцлээ