Үе тэнгийн дээрэлхэлт гэдэг зүгээр нэг хүүхдүүдийн хоорондын маргаан биш. Энэ бол хүүхдийн сэтгэл зүй, өөртөө итгэх итгэлд гүн шарх үлдээдэг ноцтой асуудал. Манай улсад энэ асуудал гарсаар байгааг үл тоож болохгүй юм.

Мэдээж үе тэнгийн дээрэлхэлттэй тэмцэхэд эцэг эх, багш, сурагчид, нийгмийн байгууллагууд бүгд хамтран ажиллах шаардлагатай. Нэг хүн ганцаараа биш, хамтдаа оролцсоноор илүү үр дүнтэй урьдчилан сэргийлж чадах юм.

Үүнд парламентаас санаа тавьж, гишүүд оролцоотой ажиллаж байна. Тодруулбал, Хүний эрх, эрх чөлөөний баталгааг хангах хүрээнд үе тэнгийн дээрэлхэлтийн шалтгаан, нөхцөл, илрэлийн хэлбэр, хор уршгийг тодорхойлон үнэлж, урьдчилан сэргийлэх, таслан зогсоох чиглэлээр хэрэгжүүлэх арга хэмжээний талаар санал, дүгнэлт гаргах үүрэг бүхий УИХ-ын ажлын хэсгийг С.Одонтуяа гишүүн ахлан ажиллахаар боллоо.

Олон улс орны туршлагуудаас суралцаж, Монгол Улсын нөхцөл байдалд тохирсон бодитой, хэрэгжихүйц шийдлийг бий болгох нь ажлын хэсгийн гол зорилго юм байна.

Олон улсын амжилттай туршлага:

Япон — "Ижмэгийн эсрэг хууль"-иар нуугдмал кейсийг ил болгосон

БНСУ — Сургууль бүрд "Хүчирхийлэл шийдвэрлэх хороо" ажиллуулдаг

Финлянд — KiVa хөтөлбөрөөр дээрэлхэлтийг 17–30% бууруулсан

Норвеги — Olweus хөтөлбөрөөр 20–50% буурсан үзүүлэлттэй

Итали — Сурагчдын өөрсдийн оролцоотой NoTrap! хөтөлбөр

Их Британи — Anti-Bullying Alliance үндэсний бодлого хэрэгжүүлдэг аж.

Эдгээр олон улсын туршлагаас манай улсад тохирох сайн туршлагыг хэрэгжүүлж, хүүхэд бүр айдасгүй суралцаж, аюулгүй орчинд аз жаргалтай өсөх эрхийг хангах нь чухал байна.

С.Одонтуяа: Хүүхэд бүр айдасгүй суралцаж, аюулгүй орчинд аз жаргалтай өсөх эрхтэй!