УИХ-ын чуулганы /2026.05.28/-ны өдрийн хуралдаан болллоо. Хуралдаанаар Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслийг хэлэлцлээ.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн Ж.Галбадрах:

Өнөөдөр Монгол Улсад хамгийн тулгамдаад байгаа асуудал бол ядуурал. Үүнээс ангижрах ганц зөв зам нь боловсролын чанар. Эдийн засаг, хөгжлийн яам, Сангийн яаманд ч тодорхой хүсэлтүүд явуулсан. Тооцоолол хийж гаргаад өнгөрсөн жилийн төсөвт тусгуулаад явж байв. Гэтэл энэ жил хөгжлийн төлөвлөгөөнд энэ бодлогоосоо ухарсан. Солонгос, Сингапурын туршлагыг л яриад байдаг. Хүнд хэцүү үеүддээ боловсролдоо маш их анхаарч байсан. Бидний нөхцөл тийм хэцүү биш байгаа. 108 сургууль, 95 цэцэрлэг гэдэг асуудлыг их ярилаа. Нэг ангид байдаг хүүхдийн тоо 40-өөс доош оруулъя. Улсын хэмжээнд 214 мянган хүүхэд байна. Үүнийг арилгахын тулд 108 сургууль зайлшгүй хэрэгтэй. Хаана барих нөхцөлүүдийг нь гаргаж, газраа чөлөөлүүлээд явж байсан. Шинэ сургууль 108 байснаас баригдаад 86 болсон. Тэгээд ахиад 53 сургууль барина гэж байгаа ч төлөвлөөгүй ийм хөгжлийн төлөвлөгөө рүүгээ орсон. АХБ-аас эдийн засгийн хүндрэлтэй үеийг давахын тулд 41 төсөл арга хэмжээг оруулж ирснээс үнийн өсөлтөөс хамаараад 33 болсон. Гэтэл үүний 8 нь үргэлжилсэн арга хэмжээнд оруулна гэсэн.

Багшийн дутагдлыг арилгах том зорилт тавьсан хэрнээ нэг ч төсөв төлөвлөсөнгүй! 20 тэрбум төгрөг оруулъя. Үүгээр цалин нэмэх бус багш нарыг татаж авах тоон болон чанарын хомсдолыг нь арилгая гэсэн ч миний санал бол дэмжигдээгүй. Багш, тухтай орчныг нь хангаж байж сургалтын чанараа ярина.

Бид хиймэл оюун ухаан тал руугаа их явж байна. Хэт их ашиглавал хүүхдийн тархины хөгжил, суралцах чадвар, сэтгэцийн эрүүл мэнд, уншиж ойлгох чадварт сөрөг нөлөөлж байна гээд хэд хэдэн орон улсаараа татгалзаад явж байна. Франц улс дижитал завсарлага гэж нэрлэсэн. Их Британи улс "Гар утасгүй сургуулийн орчин" ч гэдэг юм уу нэг ийм тренд явж байна. Үүнтэй манай улсын бодлого хэр нийцэж байна?

Ж.Галбадрах: Багшийн дутагдлыг арилгах том зорилт тавьсан хэрнээ нэг ч төгрөг төлөвлөсөнгүй!