Эдийн засгийн байнгын хорооны /2026.06.09/-ний өдрийн хуралдаанаар Бизнесийн эрх чөлөөний хуулийн төслийг хэлэлцэх эсэхийг хэлэлцлээ.

Хэлэлцэж буй асуудалтай холбогдуулан УИХ-ын гишүүн Б.Мөнхсоёл дараах байр суурийг илэрхийлэв.

Өмнөх Ерөнхий сайдын үед яригдаж байсан Бизнесийн эрх чөлөөний тухай, Эдийн засгийн эрх чөлөөний тухай хууль гэж ойлгож байгаа. Энэ дундаас хамгийн тулгамдсан бөгөөд шийдвэл зохистой зүйл нь Хөрөнгө оруулалтын тухай хуулийн төсөл юм.

Өнгөрсөн 4 жил энэ хууль орж ирээд буцаагдсан. Яаралтай шийдэхгүй бол Монголд хөрөнгө орж ирэхгүй байна. Гадаадын байтугай дотоодын хөрөнгө оруулалт ч гацаж байна. Эдийн засаг царцаж байна. Ядуурлын түвшин, ажилгүйдэл өндөр хэвээр байгаа тул хөрөнгө татах нь маш чухал болоод байна.

Хуулийн төсөлд орж ирсэн заалтуудын хувьд "Тогтворжуулалтын гэрээ" байгуулах энэ төрлийн одоо механизмууд орж байж өрсөлдөх чадвараа нэмэх гээд байгаа. Тогтворжуулах гэдэг нь татварыг гэнэт бууруулах, хөнгөлөх гэсэн үг биш. Одоогийн байгаа түвшиндээ барих, ЗГ нь тогтворгүй, улс төржилт хэтийдсэн манайх шиг улсад сөрөг өөрчлөлт гарахгүй гэдгийг баталгаажуулж буй явдал. Тэгэхээр хэлэлцэх эсэхийг дэмжчихээд нарийн хуулиуд руугаа гүйцэд орж судлах, сайжруулах шаардлага байна гэж харж байна.