Залуучуудыг үндэсний урлагаар дамжуулан соён гэгээрүүлж, эх оронч сэтгэлгээг төлөвшүүлэх чухал

Сайд Ж.Алдаржавхлан Улсын Драмын эрдмийн театр (УДЭТ)-ын үйл ажиллагаа, хэтийн төлөвлөгөөтэй танилцаж, удирдлага, уран бүтээлчидтэй уулзлаа.

УДЭТ нь түүхт 95 жилийн ой болон их зохиолч Д.Нацагдоржийн мэндэлсний 120 жилийн ойтойгоо золгож байгаа бөгөөд 2026-2030 оныг "Үндэсний", "Сэдэвлэсэн", "Өрнө дахины", "Дорно дахины", "Уран сэтгэмжит" жүжгийн нэрэмжит жил болгон зарлаж, 2031 онд тохиох 100 жилийн ойн хүрээнд "Занабазар" олон улсын наадам зохион байгуулахаар төлөвлөсөн байна. Театрын хамт олон Монгол үндэстний театрын дэг сургуулийг уламжлан хөгжүүлэгч, Евроазийн нэр хүнд бүхий драмын театр байх алсын харааг дэвшүүлэн ажиллаж байна.

Театрын зүгээс театрын статусыг ахиулж нэрийг "Үндэсний Драмын эрдмийн театр" болгон өөрчлөх, уран бүтээлчдийн ажиллах орчин нөхцөлийг сайжруулж өрөө тасалгааг тохижуулах, их зохиолч Д.Нацагдоржийн хөшөөг театрын өмнөх талбайд шилжүүлэн байрлуулах, ОХУ-д болох "Александринскийн олон улсын театрын фестиваль"-д "Тэнгэрийн хүү" жүжгээр оролцох бэлтгэл ажлыг хангахын зэрэгцээ наадмын нээлтийг сайдаар хийлгэх хүсэлтийг уламжиллаа.

Сайд Ж.Алдаржавхлан салбарын бодлого, цаашдын зорилтыг танилцуулахдаа "Соёл түгээх хүртээмж ба гадаад харилцаа"-ны бодлогыг анхаарч, 2027 онд залуучуудыг үндэсний урлагаар дамжуулан соён гэгээрүүлж, эх оронч сэтгэлгээг төлөвшүүлэх, түүнчлэн Монгол Улсын соёлыг олон улсад таниулах бодлого баримталж ажиллахыг чухалчлав.

Мөн салбарын хөрөнгө оруулалт, шинэчлэлийн хүрээнд тус театрын дээврийн засварын ажил эхлээд байгааг дурдаад, цаашид соёл, урлагийн салбарын ажилтнуудын цалин хөлс, нийгмийн баталгаа болон ажлын байрны нөхцөлийг сайжруулах зэрэг асуудлыг шат дараатайгаар шийдвэрлэж, яамны зүгээс анхааран ажиллахаа илэрхийллээ.

Хүүхэлдэйн театрын хүртээмжийг нэмэгдүүлж, хүүхдийн хөгжлийг дэмжинэ

Сайд Ж.Алдаржавхлан Улсын хүүхэлдэйн театрт ажиллаж, байгууллагын үйл ажиллагаа, уран бүтээлчдийн нөхцөл байдалтай танилцлаа.

Хүүхэлдэйн театр нь хүүхэд багачуудад урлагийн гоо зүйн боловсрол олгох, хүүхдийн төсөөлөн бодох чадварыг хөгжүүлэх, үлгэр домгийн ертөнцөөр аялуулах онцгой ач холбогдолтой байгууллага юм.

Соёл, спорт, аялал жуулчлал, залуучуудын сайд Ж.Алдаржавхлан театрын явуулын аялан тоглолтыг нэмэгдүүлэх, хүүхэд багачуудад урлаг, соёлын үйлчилгээг илүү ойртуулах зорилгоор тус байгууллагыг өөрийн гэсэн автобустай болгох шийдвэр гаргалаа. Түүнчлэн шинэ барилгын зардлыг 2027 оны улсын төсөвт тусгах, цаашид төсвөөс хараат бусаар орлого бүрдүүлэх маркетинг, менежментэд онцгой анхаарч ажиллахыг холбогдох албан тушаалтнуудад үүрэг болголоо. Салбарын яамнаас театрын үйл ажиллагааг олон улсын жишигт хүргэх, техник тоног төхөөрөмжийг шинэчлэхэд бүх талын дэмжлэг үзүүлэн ажиллах болно.

Үндэсний урлаг аялал жуулчлалыг татах гол хөшүүрэг юм

ҮУИТ нь 76 жилийн түүхэнд үндэсний язгуур урлаг, соёлын өвийг хадгалан хамгаалж, тив дэлхийд сурталчлан "ардын дипломат"-ын үүрэг гүйцэтгэж ирсэн ууган байгууллага юм.

Сайд Ж.Алдаржавхлан Үндэсний урлагийн их театрын (ҮУИТ) удирдлага, уран бүтээлчидтэй уулзаж, байгууллагын хэтийн төлөв, салбарын бодлого болон нийгмийн хамгааллын асуудлыг хэлэлцэн, цаашид хэрэгжүүлэх ажлын талаар санал солилцлоо.

Уулзалтаар уран бүтээлчдийн нийгмийн хамгаалал, гоцлол болон олны хэсгийн бүжигчдийн тэтгэвэр, нийгмийн даатгалын асуудлыг хууль эрх зүйн хүрээнд шийдвэрлэх талаар ярилцлаа. Театрын удирдлагууд хөгжмийн зэмсгийн шинэчлэлийн хүрээнд "Их бүрээ" хэрэгцээтэй байгааг танилцуулсныг Сайдын зүгээс анхааралдаа авч, холбогдох санхүүжилтийг энэ оны төсвийн тодотголд тусгаж шийдвэрлэхээ илэрхийллээ.

Аялал жуулчлалыг татах гол хөшүүрэг нь үндэсний урлаг, соёлын өв тул гадаадын жуулчдад зориулсан соёлын бүтээгдэхүүн, үйлчилгээг бий болгоход тус театрын үүрэг чухал байгааг онцоллоо. Энэ хүрээнд 2027 онд залуучуудыг үндэсний урлагаар дамжуулан соён гэгээрүүлж, эх оронч сэтгэлгээг төлөвшүүлэх, Монголын соёлыг олон улсад таниулах цогц бодлого баримтлан ажиллахаа салбарын яамнаас мэдэгдлээ.

Хүүхэлдэйн театрын хүртээмжийг нэмэгдүүлж, хүүхдийн хөгжлийг дэмжих шийдвэр гаргалаа