УИХ-аар Татварын хуулиудыг хэлэлцсэн эдгээр өдрүүдэд ААН, иргэдэд ээлтэй хэд хэдэн онцлог зохицуулалтууд сошиал орчинд олны анхаарлын төвд яригдлаа.

Тухайлбал, 792 мянган төгрөгийн цалингийн орлогод хувь хүний орлогын албан татварыг тэглэх, 792 мянгаас 2 сая төгрөгийн орлоготой иргэд 1 хувиар төлөх зохицуулалт дундаж давхаргаа дэмжсэн, иргэдийг хөдөлмөрлөх зорилгод сэдэлжүүлсэн чухал заалт болохыг хэн хүнгүй л ярьж байна.

Гэтэл сайны хажуугаар саар гэгчээр Эрчим хүчний зохицуулах хорооноос дулаан, цахилгааны суурь үнийг 5 хувиар нэмэгдүүлэх шийдвэр гарч, энэ сарын 5-аас тооцож эхлэхээр болсныг мэдэгдээд байна.

Энэ талаар УИХ-ын гишүүн П.Батчимэг дараах байр суурийг илэрхийллээ.

“Бүгдээрээ сайхан амарч байх хойгуур л төсвийн хулгай, заль мэх яваад л байгаа. Хамгийн олиггүй нь иргэд, аж ахуйн нэгжийг үнийн дарамтад оруулахгүй, иргэд, татвар төлөгчид биш ТӨР өөрөө бүсээ чангалах ёстой гэсэн Г.Занданшатарын ЗГ-ын шийдвэр яасан бэ! Дулаан, цахилгааны үнийн тариф 5%-иар нэмэгдэнэ гэдэг юун татвар бууруулах, юун тэтгэврийн шаталсан нэмэгдэл. Бөөн юм болж байж ганц нэг гарц шийдэл олох аядаж байтал араар нь үнэ тариф нэмэх шийдвэр гэнэт гаргаад явчихаж” гэв.

Иргэн Р.Шинэгэрэлийн d-parliament өргөдөл гомдлын системд үүсгэсэн ХХОАТ-ын 10 хувийг 1 болгох санаачилгад 106 мянган иргэн нэгдэж гарын үсэг зурснаар УИХ, байнгын хороодын эрхлэх асуудалд орох эрх үүссэн юм. Улмаар УИХ-ын гишүүн Ж.Баярмаа, П.Батчимэг нарын 32 гишүүн энэ санаачилгыг хуульд тусгахаар ажиллаж байгаа билээ.

Засгийн газраас татварыг энэ хэмжээгээр хөнгөлөх нь төсөвт өндөр ачаалал үүсгэх тул боломжгүй гэж үзэн татгалзсан байдаг.

Төсөвт үүсэх ачааллыг хэрхэн шийдэх гаргалгааг УИХ-ын индэр, эдийн засагчид, экспертүүд дэвшүүлсээр байгаа юм. Гэтэл өнгөрөгч Баасан гарагийн чуулганы хуралдаан дээр Засгийн газар ХХОАТ-ыг 1 хувь болгох хуулийн өөрчлөлтийг оруулж ирлээ.

Ямартай ч Засгийн газар заль хэрэглэсэн, гишүүдийн хөдөлмөрийг “үнэгүйдүүлсэн” эсэхээс үл хамаарч ХХОАТ-т өгдөг цалингийн 10 хувь 1 болж батлагдах нь чухал байна.

П.Батчимэг: ХХОАТ-ыг 1 хувь болгох шийдлээ арайхийн олтол зөрүүлээд дулаан, цахилгааны үнийг 5%-иар нэмэх нь төсвийн хулгай, заль мэх явж байгааг харуулж байна!