Монголын эрчимт эмчилгээ, яаралтай тусламж, мэдээгүйжүүлгийн салбарын эмч, мэргэжилтнүүдийг нэгэн зорилгын дор нэгтгэсэн “MAEIC-2026” /2026.06./олон улсын чуулган боллоо.

Хүний амь нас минут, секундээр хэмжигдэх мөчид мөр зэрэгцэн ажилладаг гурван салбарын үе үеийн эмч, мэргэжилтнүүд мэдлэг, туршлагаа хуваалцаж, салбарын хөгжлийг хэлэлцэв.

УИХ-ын гишүүн Ж.Чинбүрэн чуулганд аварч болох эндэгдлийг бууруулахад салбаруудын уялдаа, хөрөнгө оруулалт, зохион байгуулалт, тусламж үйлчилгээний тогтолцоог хэрхэн сайжруулах талаар төрийн бодлого болон хэрэгжиж эхэлсэн томоохон төслийн талаар илтгэлээ танилцууллаа.

Тэрбээр "Монгол Улсад жил бүр ойролцоогоор 18 мянган хүн нас бардгийн 6000 орчим нь харвалт, зүрхний шигдээс, осол гэмтэл болон бусад шалтгаантай. Түргэн тусламж цаг алдалгүй хүрч, зөв оношилгоо, эмчилгээ үзүүлж чадвал эдгээр амь насыг аврах боломжтой.

Би Эрүүл мэндийн сайдаар ажиллаж байхдаа орон нутгийн яаралтай болон эрчимт эмчилгээний тусламжийг цогцоор нь шинэчлэх Азийн хөгжлийн банкны 241 сая ам.долларын томоохон төслийг санаачлан, хэлэлцээг эхлүүлж байв.
Орон нутгийн эрүүл мэндийн тусламжийн түүхэнд цар хүрээ, хөрөнгө оруулалт, ач холбогдлоороо онцгой энэ төслийг бичиж, бодит ажил болгон эхлүүлж чадсандаа өнөөдөр ч баяртай, бахархалтай байдаг" хэмээн онцлов.

Төслийн хүрээнд 21 аймаг, сумдын эмнэлгийн барилга, эрчимт эмчилгээний ор, тоног төхөөрөмж, түргэн тусламжийн автомашин, холбоо мэдээллийн дэд бүтэц, хүний нөөцийг цогцоор нь бэхжүүлж байна.

Мөн орон нутгийн 130 түргэн тусламжийн автомашиныг 24 цагийн Дуудлагын удирдлагын төвтэй холбож, эмч нар амь тэнссэн үед нарийн мэргэжлийн зөвлөгөөг шуурхай авах телемедициний тогтолцоог бүрдүүлнэ.

Иргэн хаана амьдарч байгаагаас үл хамааран амь тэнссэн үедээ чанартай тусламжийг цаг алдалгүй авах ёстой. Өргөн уудам нутгийнхаа өнцөг булан бүрд энэ тогтолцоог бэхжүүлж чадвал олон мянган хүний амь насыг аварч, олон мянган гэр бүлийг элэг бүтэн үлдээж чадна. Аварч болох амь бүрийг авардаг тогтолцоог Монголдоо бий болгохын төлөө эхлүүлсэн энэ ажил бодит үр дүнд хүрнэ гэдэгт итгэлтэй байна хэмээн нэмж тодотгов.

Ж.Чинбүрэн: Аварч болох амь бүрийн төлөө эхлүүлсэн тогтолцооны шинэчлэл үр дүнд хүрнэ