БНСУ-ын Солонгос Монголын Бирж Солилцооны Холбоо Монгол Улсад 15 дахь жилдээ хараа шалгах, нүдний шил тааруулах сайн дурын үйл ажиллагаагаа амжилттай хэрэгжүүлж байна.

Тус холбоо нь 2011 оноос хойш монгол иргэдэд холын болон ойрын харааны, хамгаалалтын болон нарны зориулалттай нүдний шилүүдийг үнэ төлбөргүй олгож ирсэн бөгөөд өнөөдрийн байдлаар нийт 23 мянга орчим хүнд 3 тэрбум воны үнэ бүхий дэмжлэг үзүүлжээ. Иргэдэд олгож буй нүдний шилүүдийг БНСУ-ын Бусан хотын хараа оношилгоо, оптикийн чиглэлээр 40 жилийн турш үйл ажиллагаа явуулж буй төвүүдэд үйлдвэрлэдэг байна.

Энэ удаагийн сайн дурын үйл ажиллагаанд холбооны дөрвөн гишүүн оролцож, иргэдэд хараа оношилгоо болон нүдний шил сонгох үйлчилгээ үзүүллээ.

Нийт гурван удаагийн үзлэгээр 650 гаруй иргэн хамрагдаж, шаардлагатай иргэдэд тохирсон нүдний шил олгох ажлыг зохион байгууллаа.

Алслагдсан болон зорилтот бүлгийн иргэдийн эрүүл мэндийг дэмжих энэхүү сайн дурын үйл ажиллагааг тогтмол хэрэгжүүлж буй Солонгос Монголын Бирж Солилцооны Холбоо болон оролцсон бүх сайн дурын ажилтнуудад талархал илэрхийлье.

Сайн дурын хараа оношилгоо, нүдний шил олгох үйл ажиллагаанд хан-уул дүүргийн 650 гаруй иргэн хамрагдлаа