Сүүлийн жилүүдэд татвар, зөвшөөрөл, хяналт шалгалтаар илэрч буй эдийн засаг дахь төрийн оролцоо тэлсээр байна.

Энэ нь Монгол Улсад хүн бүрийн хөдөлмөрлөж бүтээх, өмч хөрөнгөө хамгаалуулах, хөрөнгө оруулах, бизнес эрхлэх, шударгаар өрсөлдөх эрх хангагдаагүйн тод илрэл юм.

Иймд Ардчилсан намын дарга, УИХ-ын гишүүн О.Цогтгэрэл, Б.Жаргалан Г.Очирбат нарын хамтаар зургаадугаар сарын 5-ны өдөр өргөн мэдүүлсэн Эдийн засгийн эрх чөлөөний тухай хуулийн төслийг Засгийн газраас санаачилсан Бизнесийн эрх чөлөөний хуулийн төсөл, дагалдах хуулиудтай нэгтгэн хэлэлцүүлэхээр төлөвлөж байна.

Ингэснээр манай улс бизнес эрхлэхэд таатай орон болох үүд хаалга нээгдэх юм.

УИХ-ын гишүүн Б.Жаргалан "Эдийн засгийн эрх чөлөө бол эдийн засгийн өсөлт, инноваци, бүтээмжийн үндэс юм. Эрх чөлөө бол хөгжлийн суурь. Баялгийг төр биш, эрх чөлөөтэй иргэд бүтээдэг" болохыг онцлов.

Хуулийн төсөлд Эдийн засгийн харилцааны эрх зүйн суурийг цэгцлэх, Үндсэн хуулийн зарчмыг бодит агуулгаар баталгаажуулах хүрээнд зарчмын шинжтэй зохицуулалтыг тусгасан байна.

Онцолбол,

Хууль ёсоор олж авсан өмчийн халдашгүй, дархан байдлыг баталгаажуулж, түүнд зөвхөн нийтийн зайлшгүй хэрэгцээг үндэслэн, шүүхийн шийдвэр, зах зээлийн бодит үнээр урьдчилан олгосон нөхөн олговортойгоор халдах нарийвчилсан журмыг тогтоох,
иргэн, хуулийн этгээдийн эрх зүйн байдлыг дордуулсан татварын болон бусад хууль тогтоомжийг буцаан хэрэглэхийг хориглож, эрх зүйн орчны тогтвортой байдлыг хангах
талууд сайн дурын үндсэн дээр байгуулсан гэрээний эрх чөлөөг төр хүндэтгэх, түүний биелэлтийг шударга, хараат бус шүүхээр хамгаалах баталгааг бий болгох,
хуулиар хориглоогүй аливаа аж ахуйн үйл ажиллагааг чөлөөтэй эрхлэх эрхийг баталгаажуулж, шударга өрсөлдөөний орчныг бүрдүүлэх үүргийг төрд хүлээлгэх,
эдийн засгийн суурь эрхийг зөвхөн Үндсэн хуульд заасан нийтийн эрх ашгийн үүднээс, хуулиар зайлшгүй шаардлагатай, хамгийн бага хэмжээнд хязгаарлах зарчмыг тодорхойлох зохицуулалтуудыг тусгасан байна

Б.Жаргалан: Баялгийг төр биш, эрх чөлөөтэй иргэд бүтээдэг