Бүгд Найрамдах Турк Улсад албан ёсны айлчлал хийж буй Монгол Улсын Батлан хамгаалахын сайд Д.Батлут БНТУ-ын Үндэсний батлан хамгаалахын сайд Яшар Гүлэртэй албан ёсны уулзалт хийлээ.

Энэхүү айлчлал нь хоёр улсын Засгийн газар хоорондын цэргийн салбарт хамтран ажиллах тухай хэлэлцээрийг 11 жилийн дараа дахин байгуулж чадсанаар онцлог болсон юм.

Уулзалтын үеэр Монгол Улс, Бүгд Найрамдах Турк Улсын батлан хамгаалах салбарын уламжлалт найрсаг харилцаа, хамтын ажиллагааг бэхжүүлэх хүрээнд хоёр улсын Засгийн газар хоорондын:

Цэргийн сургалтын хамтын ажиллагааны протокол

Цэргийн салбарын санхүүгийн хамтын ажиллагааны тухай хэлэлцээр

Санхүүгийн тусламжийг хэрэгжүүлэх протоколыг үзэглэлээ.

Цэргийн сургалтын хамтын ажиллагааны протокол нь хоёр улсын Зэвсэгт хүчний алба хаагчдыг харилцан сургах, мэргэжил дээшлүүлэх, туршлага солилцох, цэргийн боловсрол, сургалтын чиглэлээр хамтын ажиллагааг өргөжүүлэхэд чиглэж байна.

Цэргийн салбарын санхүүгийн хамтын ажиллагааны тухай хэлэлцээр болон Санхүүгийн тусламжийг хэрэгжүүлэх протоколын хүрээнд Монгол Улсын батлан хамгаалах салбарын чадавхыг бэхжүүлэх, техник, тоног төхөөрөмжийн шинэчлэл, сургалт бэлтгэлийг дэмжих, харилцан ашигтай төсөл, хөтөлбөрүүдийг хэрэгжүүлэх боломж нэмэгдэх юм.

Эдгээр баримт бичиг нь Монгол Улс, Бүгд Найрамдах Турк Улсын батлан хамгаалах салбарын түншлэлийг улам гүнзгийрүүлэх, бүс нутаг болон олон улсын аюулгүй байдал, энх тайвны төлөөх хамтын хүчин чармайлтад өндөр хувь нэмэр оруулах юм.

Монгол Улсын Батлан хамгаалахын сайд Д.Батлут хоёр улсын батлан хамгаалахын салбарын түншлэлийг бэхжүүлэхэд оруулсан жинтэй хувь нэмрийг нь өндрөөр үнэлж, БНТУ-ын Үндэсний батлан хамгаалахын сайд Яшар Гүлэрт “Олон улсын цэргийн хамтын ажиллагааны төлөө” медалийг хүндэтгэлтэйгээр гардуулан өгсөн юм.

терроризм, кибер аюулгүй байдал, гамшгийн эрсдэлийн удирдлага зэрэг нийтлэг сорилтуудтай тэмцэхэд төрийн байгууллагууд хоорондын хамтын ажиллагааг улам өргөжүүлнэ

Турк Улсын Дотоод хэргийн сайд Мустафа Чифтчитэй албан ёсны уулзалт хийлээ. Уулзалтын эхэнд Батлан хамгаалахын сайд Д.Батлут цаг зав гарган хүлээн авч уулзаж буйд талархал илэрхийлж, энэ оны тавдугаар сард Монгол Улсад болсон Монгол, Туркийн Засгийн газар хоорондын Эдийн засаг, худалдааны хамтарсан хорооны ээлжит хуралдаанд амжилттай оролцож, хоёр улсын хамтын ажиллагааг өргөжүүлэхэд үнэтэй хувь нэмэр оруулсанд нь талархал илэрхийлэв.

Талууд уулзалтаар Монгол, Туркийн уламжлалт найрсаг харилцаа, стратегийн түншлэлийн хүрээнд аюулгүй байдал, хууль сахиулах байгууллагуудын хамтын ажиллагаа, бүс нутгийн тогтвортой байдал болон харилцан сонирхсон бусад асуудлаар санал солилцов.

Мөн терроризм, кибер аюулгүй байдал, гамшгийн эрсдэлийн удирдлага зэрэг нийтлэг сорилтуудтай тэмцэхэд төрийн байгууллагууд хоорондын хамтын ажиллагааг улам өргөжүүлэхийн чухлыг тэмдэглэж, энэ чиглэлээр хамтын ажиллагааг идэвхжүүлэх талаар ярилцлаа.

Батлан хамгаалахын сайд Д.Батлут Монгол Улс Турк Улсыг түүх, соёлын гүн хэлхээ холбоотой, “гуравдагч хөрш”, стратегийн түнш орон хэмээн үздэгийг онцолж, хоёр улсын төрийн байгууллагуудын хамтын ажиллагаа, харилцан ойлголцол нь стратегийн түншлэлийн харилцааг бэхжүүлэхэд чухал хувь нэмэр оруулж байгааг тэмдэглэв.

Монгол-Туркийн Засгийн газар хоорондын хамтарсан хорооны хүрээнд тохиролцсон ажлуудыг бодит үр дүнд хүргэхийн төлөө нягт хамтран ажиллахаа илэрхийлж, хоёр орны найрсаг харилцаа, хамтын ажиллагааг цаашид улам өргөжүүлэн хөгжүүлэхийн төлөө байгаагаа нотлов.

Монгол, Турк улсын батлан хамгаалах салбарын хамтын ажиллагааны хэлэлцээрийг 11 жилийн дараа дахин үзэглэв