УИХ-ын 2024 оны сонгуулийн үр дүнд байгуулагдсан 126 гишүүнтэй парламентын 4 дэх чуулган дунджаар 82 хувийн ирцтэй нийт 35 удаа чууллаа. Эл хугацаанд 278 хууль баталсны 220 нь хууль, 58 нь тогтоол бөгөөд УИХ-ын Байнгын хороод нийт 127 удаа хуралдлаа. Мөн энэ удаагийн Хаврын чуулган Намрын чуулгантай харьцуулахад гишүүдийн ирц 5 хувиар нэмэгдсэн эерэг мэдээ байна.

УИХ-ын гишүүн С.Бямбацогт УИХ-ын даргаар томилогдоод 3 сарын хугацаа өнгөрлөө. Эл хугацаанд ард иргэдийн төлөө, парламентынхаа үйл ажиллагааг чиглүүлэхэд онцгой анхаарч ажилласан юм. Нэг үгээр хэлбэл төр төвтэй бус хүн төвтэй “хууль” баталдаг байх. Төрийн байгууллагад зориулсан биш иргэндээ, хүндээ зориулсан “хууль” баталдаг байхад том дэвшлийг хийсэн гэж хэлж болно.

Тухайлбал улсын хөгжлийг дэмжсэн, эдийн засаг, нийгмийн тулгамдсан асуудлыг шийдвэрлэсэн, иргэдийн амьдралын чанар, орлогод анхаарсан, бизнес эрхлэгчдийг дэмжсэн хууль, тогтоолуудыг баталсан. Үүнд: Эдийн засгийн эрх чөлөөний тухай хууль байна. Тус хуулиар төр хувийн хэвшилтэй өрсөлдөхгүй, гэнэтийн шийдвэр гаргахгүй, үнэ тогтооход оролцохгүй, хөрөнгө оруулагчдад ээлтэй байх эрх зүйн орчныг бүрдүүлж, эрчим хүч, санхүү, боловсрол, барилгын салбарт 41 тусгай зөвшөөрлийг хүчингүй болгосон. Мөн илүү татвар төлсөн нь илүү тэтгэвэр авах, ирэх оны 1 дүгээр сараас ахмадуудын тэтгэвэр нэмэгдэх боломжийг бүрдүүлсэн Нийгмийн даатгалын ерөнхий хууль, бага дунд орлоготой иргэдийг дэмжсэн ХАОАТ болон ААНОАТ-ын тухай хуулиудад нэмэлт, өөрчлөлт оруулах тухай хууль, иргэдийн эрүүл мэндэд анхаарсан Эрхтэн, эд, эс шилжүүлэн суулгах болон Цусны донорын тухай хуулиуд зэрэг олон хуулиудыг баталсан. Түүнчлэн,

“Нээлттэй парламент” тогтолцоог нэвтрүүлж, иргэд хууль тогтоох үйл ажиллагаанд шууд оролцох боломжийг бүрдүүлэв.
Гишүүдийн ирц, санал хураалтын мэдээллийг бодит цагийн горимоор олон нийтэд нээлттэй болгож, парламентын ил тод байдал, хариуцлагыг шинэ шатанд хүргэв.
Зөвхөн хууль батлаад зогсохгүй, парламентын үйл ажиллагааг иргэдэд улам ойртуулж, оролцоо, хяналтыг бодит ажил болгох шинэчлэлийг эхлүүллэв.

Тодруулбал иргэд нээлттэй парламент цэсээр зочилж УИХ-д санал бодлоо илэрхийлж, хуулийн давхардал, хийдэл, зөрчил, хэрэгжихгүй байгаа, амьдралд дөнгө болж байгаа хуулиудын талаар санал бодлоо илэрхийлэхэд нээлттэй болсон юм.

УИХ-ын дарга С.Бямбацогт “Ирэх намраас илүү их Их хурлынхаа үйл ажиллагааг ард иргэдийнхээ дуу хоолойг сонсож, иргэдийнхээ оролцоо дээр тулгуурлаж хэн нэг хүнд зориулсан хэсэг бүлэглэлд зориулсан хууль баталдаг биш нийт иргэн, улсын эрх эрхийг эрхэмлэсэн хууль баталдаг парламент болохын төлөө анхаарч ажиллана аа. Хэдийгээр дэлгэр сайхан зун болж байгаа ч Монгол төр амрахгүй ажиллана” гэв.

Иргэд УИХ-ыг хянадаг, парламент иргэдээ сонсдог, иргэдээ оролцуулдаг үйл явц тасралтгүй үргэлжилнэ!