Удирдлагын ур чадвар, манлайллаас байгууллагын өсөлт хамаардаг бол менежерийн чадамж нь сэтгэлгээ болон ур чадварын нийлбэр байдаг.

Монгол менежерүүдийн потенциал, ур чадвар дэлхийн аль түвшинд, хэр зөрүүтэй яваа хийгээд давуу талаа хэрхэн тодотгож, сул талаа хэрхэн хөгжүүлж Глобал менежерийн түвшинд хүрч болохыг сүүлийн 5 жилийн хугацаанд Сэтгэл судлалын үндэсний төвтэй хамтран 1033 менежерт “Central Test" аргачлалаар хийсэн "Монгол менежерийн дүр төрх" судалгааны тайлангаас харж болно.

Central Test нь хувь хүний зан чанар, ур чадвар, сэтгэл зүй болон ажлын байрны нийцлийг шинжлэх ухааны үндэслэлтэйгээр үнэлж, оношлох зорилготой олон улсад баталгаажсан аргачлал юм.

Уг судалгааг бие хүний 19 онцлог шинж чанар, сэтгэлгээний болон ажиллах хэв маяг, 9 бүлгийн 59 ур чадварыг шинжлэх ухааны үндэслэлтэй, бодит датад тулгуурлан боловсруулсан. Ингэснээр бид цаашдаа хүний нөөц, менежментийн талаар ярихдаа ажиглалт бус статистик тоон мэдээлэлд тулгуурладаг болох давуу талтай.

Инфографик: Дэлхийн эдийн засгийн форумаас 55 улсын 22 салбарын 1000 гаруй томоохон ажил олгогчдын саналыг үндэслэн "Ирээдүйн ажлын байрны тайлан"-аар дамжуулан менежерүүдэд шаардлагатай ур чадваруудыг тогтмол зарладаг.

2025-2030 онд аналитик сэтгэлгээ, манлайлал, нийгмийн нөлөөлөл үзүүлэх, талент менежмент, уян хатан, дасан зохицох, даван туулах, хүн төвтэй, бүтээлч сэтгэлгээтэй байх удирдлагын ур чадварууд хамгийн үнэ цэнтэйд тооцогдож байна.

МЕНЕЖМЕНТИЙН БАГИЙН ТӨЛӨВШЛӨӨС КОМПАНИЙН ӨСӨЛТ ШУУД ХАМААРНА.

Харин монголчуудад тулгамддаг хамгийн чухал асуудал нь менежментийн багийн төлөвшил юм.
Бизнес эрхлэх боломж хүн бүрт нээгдэж, хувийн хэвшлүүд олноороо бий болох эхэн үед компанийн үүсгэн байгуулагч нь захирлын үүргээ давхар гүйцэтгэдэг байсан бол өнөөдөр сайн засаглалтай, менежмент, манлайллаар удирдуулсан, олон улсын стандартад нийцсэн бүтээгдэхүүн, үйлчилгээг үзүүлэх зорилготой Корпорацын түвшинд хөгжсөн олон компаниуд бий болжээ.

Тайланд дурдсанаар монгол менежерүүдийн ур чадварын ерөнхий дундаж оноо 100-аас 55 буюу хөгжих боломжтой түвшинд үнэлэгдсэн. Энэ нь өсөж дэвжих нөөц бололцоо хангалттай байгаа ч потенциалаа бүрэн ашиглаж тогтвортой өндөр гүйцэтгэл үзүүлэхэд хараахан бэлэн биш байгааг харуулж байгаа юм.

Онцолбол, менежментийн 7 хэв маягаас төслийн менежер хэв маяг 88 хувь буюу маш өндөр түвшинд илэрсэн. Энэ нь зорилго, хугацаа, хэрэгжилтэд төвлөрсөн, ажил үүргийг системтэй зохион байгуулдгийг илтгэнэ. Түүнчлэн сэтгэл хөдлөл өндөр, дүрэм журам дагаж, тогтвортой ажиллах хэв мяг мөн л өндөр түвшинд байна.

МОНГОЛ МЕНЕЖЕРҮҮДИЙН 62 ХУВЬ НЬ ӨӨРЧЛӨЛТИЙГ ЭСЭРГҮҮЦЭХ ХАНДЛАГАТАЙ БАЙГАА НЬ ӨНӨӨГИЙН ХУРДАЦТАЙ ХУВЬСАЖ БУЙ ЗАХ ЗЭЭЛД ТОМООХОН СОРИЛТ ДАГУУЛЖ БАЙНА.

Монгол менежерийн

● Анализ хийх ур чадвар -58%

● Бизнесийн боломжийг тодорхойлох ур чадвар - 47%

● Шийдвэр гаргах ур чадвар - 30%

● Хариуцлага хүлээх ур чадвар - 48%

● Манлайлах ур чадвар - 15%

● Бусдад нөлөөлөх ур чадвар - 21% байна.

Товчхондоо, ажилчдаа хөгжүүлэх, баримтад тулгуурлах, сэтгэл хөдлөлөө зохицуулах, шинийг турших суурь давуу талтай ч; шаардлага тавих, байр сууриа тууштай илэрхийлэх, өөрчлөлтийн үед дасан зохицох, шийдвэрийг хурдан хэрэгжүүлэх зэрэгт учир дутагдалтай байгааг судалгааны үр дүн харуулсан. Энэ нь сул хөгжсөн эдгээр чадвар нь байгууллагын өрсөлдөх чадварт шууд нөлөөлөхүйц, анхаарах шаардлагатай үндсэн чиглэлүүд гэсэн үг.

ХҮН БҮРТ АВЬЯАС, УР ЧАДВАР БИЙ. ҮҮНИЙГ НЬ ҮНЭЛЖ, ХӨГЖҮҮЛЭЭД, ЧИГ ҮҮРГИЙГ НЬ ЗӨВ ХУВААРИЛЖ ЧАДВАЛ БАЙГУУЛЛАГА ТАСРАЛТГҮЙ ХӨГЖИНӨ.

Өрсөлдөх чадвараа сайжруулахын тулд дан ганц дээр дурдсан ур чадварууд хангалттай бус менежер хүн ямар хандлага, сэтгэлгээтэй байгааг үнэлж, хөгжүүлэх нь чухал.

Бид судалгаандаа бусдыг удирдах, өөрийгөө удирдах, өөрчлөлтийг удирдах, гүйцэтгэлийг удирдах гэсэн 4 төрөл, 19 үзүүлэлтээр судлахад сэтгэл хөдлөлөө удирдах чадвар хамгийн өндөр буюу 48 хувьтай байгаа ч үүний цаана 52 хувь нь удирдаж чаддаггүй үзүүлэлт харагдаж байх жишээтэй.

Английн Захирлуудын Институтаас захирлын чадамжийг сэтгэлгээ+ур чадвар гэж тодорхойлсон байдаг. Мөн амжилттай яваа 2500 захирлын дунд явуулсан “Ceo Mindset” судалгаагаар тэд 6 төрлийн сэтгэлгээтэй байсан бөгөөд эдгээрийг тус бүр 3, 3-н дадлаар бий болгосон гэж үздэг.

Д.ЕРӨӨ: МОНГОЛ МЕНЕЖЕРҮҮД ГЛОБАЛ ТҮВШИНД МАНЛАЙЛАЛ ҮЗҮҮЛЭХЭД СЭТГЭЛГЭЭНИЙ ХӨГЖИЛ ДУТАГДАЖ БАЙНА