Өнгөрсөн нэг жилийн хугацаанд боловсролын салбарын суурь асуудлыг шийдвэрлэх, эрх зүйн орчныг сайжруулах, нийгмийн хөгжлийг дэмжих чиглэлээр хийж гүйцэтгэсэн гол ажлуудынхаа тайланг товчхон хүргэж байна.

1. Боловсролын салбарын хөрөнгө оруулалт: 2026 оныг "Боловсролыг дэмжих жил" болгон зарлуулсны хүчинд шинэ түвшинд гарч, 1.1 их наяд төгрөг давсан. Сургууль, цэцэрлэгийн хүртээмжийн хувьд, их өгөгдөлд суурилан 108 сургууль, 95 цэцэрлэг шинээр барих эрэмбийг тогтоосон ба үүнээс 22 сургууль, 11 цэцэрлэгийн санхүүжилт шийдэгдсэн.

УИХ-ын 29 гишүүний хамт "Боловсролыг дэмжих лобби бүлэг"-ийг санаачлан байгуулсан ба МАН-ын дэргэдэх "Боловсрол, шинжлэх ухааны бодлогын хороо"-г ахлан ажиллалаа.

УИХ-ын даргын захирамжаар байгуулагдсан "Боловсролын ерөнхий хуулийн хэрэгжилтийг хангах" хоёр ч ажлын хэсгийг ахалж ажилласан. Түүнээс гадна 8 хуулийн төсөл хамтран өргөн барив.

2. Багш бэлтгэдэг их сургуулийн материаллаг баазыг бэхжүүлэхэд чиглэсэн бодит ажил санаачлан, Ротари клубтэй хамтран МУБИС-д 72,000$-ийн өртөг бүхий Байгалийн ухааны лабораторийг хүлээлгэн өгөв. Ирэх хичээлийн жилд 180,000$-ийн өртөг бүхий Физикийн лабораторийн төслийг эхлүүлээд байна.

Өөрийн үүсгэн байгуулсан “Шинэ Монгол–Мабүчи” тэтгэлгийн сангийн хүрээнд орон нутгаас ирсэн 40 оюутанд тус бүр 1.500$ ам.долларын тэтгэлгийг шинээр олгов. 11 дэхь жилдээ олгож байгаа ба нийт 396 оюутанд 1.46 сая долларын тэтгэлэг олгожээ.

Багшийн тоон болон чанарын хомсдолыг асуудлаар олон нийтийн нээлттэй хэлэлцүүлэг, ЕБС-ийн захирлуудын уулзалтуудыг зохион байгуулж тулгамдаад буй асуудлыг ярилцав.

МУБИС-ийн шинэ элсэгчид болон төгсөх оюутнуудад зориулж, "Хүний багш" сэдэвт лекц уншлаа.

3. Орон нутаг (Дорноговь, Орхон, Булган, Сэлэнгэ, Дархан) болон нийслэлийн 1,200 гаруй иргэд, багш нартай тусгайлан уулзаж санал бодлыг нь сонсов. Монгол-Японы парламентын найрамдлын бүлгийн даргын хувиар Япон Улсын Цог Жавхлант Эзэн Хааны айлчлалд оролцож, Японы Парламентын төлөөлөгчдийн танхимын гишүүдийн айлчлалыг амжилттай хүлээн авч, БНСУ, Япон болон Казахстан улсад томилолтоор ажиллаж боловсролын салбарын туршлага судаллаа.