УИХ-ын Төсөв болон Аюулгүй байдал, гадаад бодлогын байнгын хорооны өнөөдрийн /2026.09.23/ хамтарсан хуралдааны эхэнд Монгол Улс болон Азийн хөгжлийн банк хоорондын “Санхүүжилтийн ерөнхий хөтөлбөр”-ийн төслийг зөвшилцөх эсэх асуудлыг хэлэлцлээ.

Геополитикийн хурцадмал нөхцөл байдлаас шалтгаалан дэлхийн эдийн засгийн тодорхой бус байдал нэмэгдэж, эрчим хүч, хүнсний бүтээгдэхүүний үнэ өсөх, нийлүүлэлтийн сүлжээ тасалдах, тээвэр логистикийн зардал нэмэгдэх, дэлхийн улс орнуудын инфляцыг өсгөх, төсөв, төлбөрийн тэнцэл болон гадаад валютын нөөцөд ихээхэн дарамт үүсгэх зэрэг эрсдэлүүд бий болсоор байна. Иймд Санхүүжилтийн ерөнхий хөтөлбөрийн хүрээнд 200.0 сая ам.доллартай тэнцэх хэмжээний төсвийн дэмжлэгийн зээл болон 250.0 сая ам.доллар хүртэлх эх үүсвэртэй болзошгүй гамшгийн үеийн зээлийн шугамыг байгуулахаар хэлэлцээрийн төслийг эцэслэсэн хэмээн Сангийн сайд хэллээ.

Мөн Засгийн газар уг санхүүжилтийг бүхэлд нь шууд авч ашиглах бус, эдийн засгийн гадаад шок, байгалийн гамшиг, бусад онцгой нөхцөл байдал үүссэн үед урьдчилан тохирсон нөхцөлийн дагуу санхүүжилт авах нөөц эх үүсвэр бүрдүүлэх явдал гэв. Манай улс өмнө нь тус банктай зудын гамшгийн үед хамтран ажиллаж ерөнхий хөтөлбөр хэрэгжүүлсэн туршлагатай. Зээлийн эргэн төлөлт 15 жил бөгөөд эхний гурван жилд үндсэн төлбөрөөс чөлөөлөгдөхөөр төсөлд тусгажээ. Байнгын хороодын гишүүдийн олонх засгийн газарт зөвшилцөх эрхийг нь олгох нь зүйтэй гэж үзсэн юм.

Үргэлжлүүлэн Монгол Улсын Засгийн газар, Япон Улсын Засгийн газар хооронд солилцох ноот бичгийн төсөл болон Монгол Улсын Засгийн газар болон Японы олон улсын хамтын ажиллагааны байгууллага хоорондын Чингис хаан олон улсын нисэх буудлын өргөтгөлийн төслийн зээлийн гэрээний төслийг зөвшилцөх эсэхийг шийдвэрлэж, гишүүдийн олонх нь дэмжлээ.
Төслийн хүрээнд Японы олон улсын хамтын ажиллагааны байгууллагын 158,3 тэрбум иен буюу ам.долларт хөрвүүлбэл 995 сая ам.долларын нэн хөнгөлөлтэй зээлээр Чингис хаан нисэх буудлыг 2028-2033 онд 81,9 мянган мкв бүхий зорчигч терминалын барилга болон дулааны станц, авто зогсоолоор өргөтгөн шинэчилнэ. Албаныхны тооцоолж буйгаар өргөтгөл ашиглалтад орсноор Чингис хаан олон улсын нисэх буудлын агаарын тээврийн хүртээмж, хүчин чадал нэмэгдэж, жилд хүлээн авах зорчигчдын тоо 1,6-5,2 сая буюу 3,2 дахин өснө гэж үзэж байна.

Монгол Улсын эдийн засгийг солонгоруулахад гол нөлөө үзүүлэх салбар бол аялал жуулчлалыг нэрлэдэг. Иймд агаарын тээврийн хөгжилд онцгойлон анхаарал хандуулах нь чухал тул төслийг дэмжиж байгаагаа байнгын хороодын гишүүд илэрхийлж байлаа

ХАМТАРСАН ХУРАЛДААН: Санхүүжилтийн ерөнхий хөтөлбөрийн төслийг зөвшилцөх нь зүйтэй гэж үзлээ