БАГАХАНГАЙ–ХӨШИГИЙН ХӨНДИЙ–ЭМЭЭЛТ (ТОЛГОЙТ) ЧИГЛЭЛИЙН 127.1 КМ ТӨМӨР ЗАМЫГ НЭЭЛЭЭ

Монгол Улсын төмөр замын сүлжээг өргөжүүлэх, Улаанбаатар хотын төвөөр дамжин өнгөрөх ачаа тээврийн урсгалыг тойруулах, нийслэлийн авто замын түгжрэл, ачааллыг бууруулах стратегийн ач холбогдолтой Багахангай–Хөшигийн хөндий–Эмээлт (Толгойт) чиглэлийн 127.1 км төмөр замын бүтээн байгуулалтын нээлт 2026 оны 10 дугаар сарын 11-ний өдөр боллоо.

Нээлтийн үйл ажиллагаанд Монгол Улсын Ерөнхийлөгч У.Хүрэлсүх, Зам, тээврийн сайд Б.Дэлгэрсайхан, төрийн болон төмөр замын салбарын байгууллагуудын удирдлага, бүтээн байгуулалтад оролцсон аж ахуйн нэгжүүдийн төлөөлөл оролцлоо.
Хангайн бүсийн газар зүйн онцлог, инженерийн нарийн төвөгтэй шийдэл шаардсан энэхүү төмөр замын төслийг Монгол Улсын Засгийн газрын шийдвэрийн дагуу “Монголын төмөр зам” ТӨХК хэрэгжүүлж, үндэсний аж ахуйн нэгжүүд, Монгол инженер, техникийн ажилтнуудын мэдлэг, ур чадвар, хамтын хүчээр бүтээн байгууллаа.

МОНГОЛ УЛСЫН ЕРӨНХИЙЛӨГЧ У.ХҮРЭЛСҮХ ШИНЭ ТӨМӨР ЗАМААР ГАЛТ ТЭРГЭЭР ЗОРЧЛОО

Монгол Улсын Ерөнхийлөгч У.Хүрэлсүх Багахангай өртөөнд хүрэлцэн ирснээр үйл ажиллагаа эхэлж, түүнийг Зам, тээврийн сайд Б.Дэлгэрсайхан, “Монголын төмөр зам” ТӨХК-ийн Гүйцэтгэх захирал О.Батчулуун, “Улаанбаатар төмөр зам” ХНН-ийн дарга Х.Хэрлэн нар угтан авлаа.
Энэ үеэр “Монголын төмөр зам” ТӨХК-ийн Гүйцэтгэх захирал О.Батчулуун Багахангай–Хөшигийн хөндий–Эмээлт (Толгойт) чиглэлийн төмөр замын төслийн хэрэгжилт, бүтээн байгуулалтын ажлын явц, инженерийн онцлог шийдлүүдийн талаар Монгол Улсын Ерөнхийлөгчид танилцуулав. Үүний дараа Монгол Улсын Ерөнхийлөгч болон албаны төлөөлөгчид Багахангай өртөөнөөс галт тэргээр хөдөлж, шинээр баригдсан төмөр замын дагуу зорчлоо.
Монгол Улсын Ерөнхийлөгч У.Хүрэлсүх Багахангайгаас Эмээлт хүртэл шинэ төмөр замын чиглэлээр зорчих явцдаа трассын 38 дугаар километрт байрлах 33 метр гүн ухмал, 43 дугаар километрт баригдсан төмөр замын хамгийн өндөр гүүр зэрэг инженерийн онцлох байгууламжуудтай газар дээр нь танилцав

Монголчууд Туул гол дээгүүр 476 метр хамгийн урт гүүр барьж чадахаа харууллаа. 1.6 жилийн хугацаанд 127.1 км төмөр замыг бий болголоо. Энэ ажилд 160 гаруй үндэсний компани, 4000 гаруй ажилтан, 1500 техниктэйгээр оролцсон

“Монголын төмөр зам” ТӨХК-ийн захирал О.Батчулуун:

"2025 оны 4 сарын 25-нд төмөр замын нээлт болсон. 1.6 жилийн хугацаанд бид 127,1км төмөр замыг барьж байгууллаа. Энэхүү төмөр замыг байгуулахад Монголын 160 гаруй үндэсний компаниуд, 4 мянга гаруй ажилчид, 1500 гаруй техник тоног төхөөрөмжтэй оролцсон. Энэхүү төмөр зам нь Хангайн бүсэд анх удаа баригдаж байгаа бөгөөд газар шорооны ажил ажлын хувьд харьцангуй их буюу 33 сая тонн куб метр шорооны ажил хийсэн. Тухайлбал, Зүүнбаян Цогтцэций чиглэлийн 416км замын газар шорооны ажил 22 сая тонн. Хангайн бүсэд баригдаж байгаагаар бол газар шорооны ажил их байна. Мөн дээрээс нь Монголчууд 176 метр, 22 метрийн өндөртэй хамгийн өндөр гүүрийг барьж байгуулж чаддаг гэдгээ харууллаа. Туул гол дээгүүр 476 метр "хамгийн урт" гүүрийг барьдгаа мөн харууллаа. Мөн Эмээлтийн 2 түвшний буюу төмөр зам, авто замын гармыг наадмын дараа буюу 7 сарын 15-нд эхлүүлээд нийтдээ 3 сарын хугацаанд барьж байгуулах ажлыг хийж чадлаа. Энэ бүтээн байгуулалтыг Монгол компаниуд, монгол инженер техникийн ажилтан хийсэн, МТЗ-ын хамт олон зураг төслийнхөн өөрсдөө хийж, өөрсдөө гүйцэтгэсэн" гэж мэдээллээ.

О.Батчулуун: Монголчууд төмөр замаа өөрсдөө барьж чаддаг гэдгээ бүтээн байгуулалтаараа батлан харууллаа