Соёл, спорт, аялал жуулчлал, залуучуудын сайдын эрхлэх асуудлын хүрээний яам, агентлаг, харьяа байгууллагуудын удирдлагын өргөтгөсөн шуурхай хурал 2026 оны 10 дугаар сарын 12-ны өдөр Монгол Улсын Үндэсний номын сангийн хурлын танхимд зохион байгуулагдлаа.

Хурлыг Соёл, спорт, аялал жуулчлал, залуучуудын сайд Ж.Алдаржавхлан удирдан явуулж, яам, агентлаг, харьяа байгууллагуудын удирдлагууд оролцлоо.

Хурлын эхэнд салбарын байгууллагуудын цаг үеийн ажил, тулгамдаж буй асуудлуудаа танилцуулж, өмнөх шуурхай хурлуудаас болон харьяа байгууллагуудад ажиллах үеэр өгсөн үүрэг даалгаврын хэрэгжилт, үр дүнгийн талаар Салбарын хяналт-шинжилгээ, үнэлгээ, дотоод аудитын газрын дарга мэдээлэл хийв.

Мөн Монголын Үндэсний музей болон Чингис хаан Үндэсний музейн удирдлагууд байгууллагын үйл ажиллагаа, тулгамдаж буй асуудал болон цаашид хэрэгжүүлэх дунд, урт хугацааны төлөвлөгөөгөө танилцууллаа.

Түүнчлэн Соёл, урлагийн газрын даргын албан үүргийг түр орлон гүйцэтгэгч Г.Батхуяг “Нүүдэлчин” дэлхийн соёлын фестиваль болон Цөлжилттэй тэмцэх тухай Нэгдсэн Үндэстний Байгууллагын конвенцын Талуудын 17 дугаар бага хурал /COP17/-ын хүрээнд зохион байгуулсан соёл, урлагийн арга хэмжээний талаар мэдээлэл өгч Монгол Улсын өвөрмөц байгаль, цаг уур, нүүдлийн ахуй амьдрал, түүх, соёлын өвийг олон улсад сурталчлан таниулах, үндэсний өв соёлоороо бахархах үзлийг олон нийтэд төлөвшүүлэх, цаашлаад Монгол Улсыг зорих жуулчдын сонирхол, урсгалыг нэмэгдүүлэхэд чиглэсэн цогц арга хэмжээ болсныг онцлов.
Хуралдааны төгсгөлд сайд Ж.Алдаржавхлан салбарын байгууллагуудын удирдлагуудад нийт 9 үүрэг даалгавар өгснөөс дурдвал Бүгд Найрамдах Солонгос Улсад зохион байгуулагдах “Монголын өдрүүд” арга хэмжээний бэлтгэлийг бүрэн хангаж, хөтөлбөр болон зохион байгуулалтын нарийвчилсан төлөвлөгөөг эцэслэн танилцуулах, Олон улсын хөлбөмбөгийн холбоо /FIFA/-ны дэмжлэгтэйгээр 25 мянган хүний суудалтай цэнгэлдэх хүрээлэн барихтай холбогдох гэрээний төслийг боловсруулах, холбогдох байгууллага, талуудын төлөөллийг оролцуулсан ажлын хэсэг байгуулах зэрэг үүрэг өглөө.

Үүрэг даалгаврын хэрэгжилтийг салбарын хяналт-шинжилгээний цахим систем болох moc.igovernment.mn-д тухай бүр байршуулж, хэрэгжилтийг бодит үр дүнд тулгуурлан тайлагнаж хэвшихийг яам, агентлаг, харьяа байгууллагын удирдлага болон холбогдох албан тушаалтнуудад үүрэг болголоо.

Соёл, спорт, аялал жуулчлал, Залуучуудын сайдын өргөтгөсөн шуурхай хурал боллоо