УИХ-ын гишүүн Ж.Галбадрах ОУ-ын Ротарийн 2780-р дүүргийн (Канагава муж) конференцод оролцож (2026.10.11, ням гариг) илтгэл тавилаа.

Олон Улсын Ротарийн байгууллага нь дэлхий даяар 1.4 сая гишүүнийг эгнээндээ нэгтгэсэн НҮБ-ийн дараа орох хүмүүнлэгийн сайн дурын том байгууллага. Монгол, Хонконг, Масао улсын Ротари клубууд нийлж 3450 гэсэн нэг дүүрэг болдог бол Японд ийм бие даасан 34 дүүрэг байдаг. Ротарийн хөдөлгөөн ихэд дэлгэрсэн билээ.

Энэ талаар Ж.Галбадрах гишүүн өгүүлэхдээ "Тус 2780 дүүргийн энэ жилийн захирагч Накагомэ сан удирдах зөвлөлийн гишүүдийн хамт 5-р сард Монголд ирэхдээ Хүрээ Ротари клубтэй хамтран нэгэн төсөл хэрэгжүүлэхээр болсон юм. Уг дүүргийн захирагчаар ажиллаж байсан, Ёнэяма Ротарийн тэтгэлгийн сангийн ерөнхийлөгч асан Озава Казүхико гуайн гэгээн дурсгалд зориулсан төсөл хийх болж, тэр эрхмийн хамгийн дотны анд байсны хувиар надад хандсан нь энэ байв.

Миний хувьд тэдний саналыг дуртайяа хүлээн авч, МУБИС-ийн удирдлагатай ярилцаад, байгалийн ухааны сургуулийн физикийн тэнхимд орчин үеийн иж бүрэн лаборатори байгуулах шаардлагатай байгааг хэлсэнээр тэд нөхцөл байдлыг газар дээр нь үзэхээр ирсэн нь энэ байв.

Одоо төслийн санхүүжилтээ бүрэн босгоод, олон улсын Ротарийн төв байгууллагаас зөвшөөрлөө хүлээж буйгаа хэллээ. "Энэ удаагийн конференцод манай төсөлд хамтран оролцох болсон Тайваны 3451, Солонгосын 3660 дүүргийн төлөөлөл ирж оролцох тул намайг өөрийн биеэр оролцож танилцаач" гэж урьсан нь ингэж цаг хугацааны хувьд ч сайхан таарлаа.

Миний хувьд концеренцын үеэр орон орноос ирж суралцаж буй залууст тэтгэлэгт оюутнуудад зориулж “МӨРӨӨДЛӨӨ БИЕЛҮҮЛЬЕ, МӨРӨӨДЛҮҮДЭЭ ХОЛБОЁ” илтгэлээ тавив.
Энэхүү конференцод 1000-аад хүн оролцож, үйл ажиллагаа өргөн дэлгэр болж байгаад баяр хүргэсэн болно. Хамгийн гол нь төсөл маань батлагдах шатандаа орсныг сонсох сайхан байв.
Хэрэв энэ эрчээрээ амжилттай батлагдвал ирэх 5-р сард лаборатори маань ашиглалтад орох юм байна. Төслийн нийт өртөг 180.000 ам доллароор батлагдах гэж байгааг сонсох бүр ч таатай байв.
Энэ төслийг ингэж хэрэгжихэд Монгол талаас Хүрээ Ротари клуб онцгой үүрэг гүйцэтгэж байгаа ба цэвэр хүмүүнлэгийн төсөл тул миний одоогийн улстөрчийн ажилтай огт холбоогүйг онцолъё. Энэхүү төслийг боловсролдоо чиглүүлж чадсан л миний үүрэг байсан гэж хэлж болно.

Өмнө нь МУБИС-ийн багшийн сургуульд "Бага ангийн багш нарт зориулсан байгалийн ухааны иж бүрэн лаборатори байгуулах" төслийг миний бие санаачилж, "Нарлаг Улаанбаатар" Ротари клубийнхэн маань Японы 2500-р дүүрэгтэй хамтран хэрэгжүүлж өнгөрсөн 3-р сард хүлээлгэн өгсөн. Төсөвт өртөг нь 72.000$ байсан ба маш сайн төсөл болсон.

Ер нь Монголын Ротари клубүүд нийгмийн сайн сайхны төлөө олон төсөл хэрэгжүүлдэг. Төр засаг хүрч чадахгүй байгаа олон салбарт, боловсрол, эрүүл мэнд, эмэгтэйчүүд, байгаль орчны чиглэлд түлхүү ажилладаг. Манай Хүрээ клуб гэхэд өнгөрсөн 25 жилийн хугацаанд 5 сая гаран долларын төсөл хэрэгжүүлсэн байна.

"Өөрөөсөө давж Өрөөлд тусалдаг" нийт Монголынхоо Ротаричуудад талархал дэвшүүлж, амжилт хүсье!" гэв.

ОУ-ын Ротарийн 2780-р дүүргийн конференцод илтгэл тавилаа