Монгол Улсын Ерөнхийлөгч санаачлан боловсруулсан Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслийг 2026 оны гуравдугаар сард өргөн мэдүүлсэн. Үүнээс гадна нэр бүхий УИХ-ын гишүүдийн зүгээс УИХ-ын гишүүдэд хариуцлага тооцох тухай хуулийн төсөл өргөн барьсан байдаг. Тэгвэл УИХ-ын гишүүнд хариуцлага тооцож, эгүүлэн татах тухай асуудалд УИХ-ын гишүүн М.Бадамсүрэн ямар байр суурь илэрхийлснийг хүргэе.

УИХ-ын гишүүн М.Бадамсүрэн:

-Үндсэн хуульд заасан үүргээ биелүүлэхгүй байгаа УИХ-ын гишүүдэд хариуцлага тооцож, эгүүлэн татах нь зөв. Би үүнтэй 100 хувь санал нэг байна. Парламент болон УИХ-ын гишүүдийн үйл ажиллагаа манлайлах учиртай. Энэ манлайллын үүргээ биелүүлэхгүй байгаа бол хариуцлага ярих ёстой. Ард түмний төлөөлөл болж, санал авсан ч гэсэн дөрвөн жилийн хугацаанд ямар ч хариуцлага ярихгүй, суудал дээр нь хадчихсан юм шиг байж болохгүй. Үүний үр дүнд парламентын нэр хүнд унаж болохгүй.

"Нэг үхрийн эвэр доргивол мянган үхрийн эвэр доргидог" гэдэг шиг хариуцлага алдсан УИХ-ын гишүүдээс болж, парламентын засаглал бүхэлдээ нэр хүндгүй болно гэдэг байж боломжгүй асуудал.
УИХ-ын дарга болон УИХ-ын даргын дэргэдэх зөвлөлөөс Ерөнхийлөгчийн болон бусад гишүүдээс өргөн барьсан хуулийн төслийг хэлэлцэх асуудлын дараалалд оруулахгүй байгааг тодруулах нь зүйтэй байх. Ер нь энэ хуулийн төслийг яаралтай хэлэлцэж, батлах ёстой. Хариуцлага дээрээсээ л тогтоно. Загас толгойноосоо эхэлж мууддаг гэдэг шүү дээ. УИХ-ын гишүүд ард түмэндээ зөвөөр үлгэрлэж, улс орны хөгжлийг түүчээлэх ёстой.

М.Бадамсүрэн: Загас толгойноосоо эхэлж мууддаг шиг хариуцлага дээрээсээ л тогтоно!