Боловсролын сайд Л.Энх-Амгалангийн өнгөрсөн 7 хоногийн үйл явдлын тоймыг хүргэж байна.

Тэрбээр "Өнгөрсөн 7 хоногийн амралтын өдөр 21 аймгийн Боловсролын газрын дарга нарыг аваад Хэнтий аймгийн Бэрх тосгонд үйл ажиллагаа явуулдаг Олон Улсын Кембриджийн хөтөлбөртэй БЭРХ ерөнхий боловсролын сургуульд очиж ажилласан.

Бидний аймаг бүрд байгуулах гээд байгаа гэрт ойрхон ТӨРӨЛЖСӨН АХЛАХ СУРГУУЛЬ гэдэг чинь энэ юм шүү. Нөгөө хотод хэдэн мянган хүүхэд орох гээд орж чаддаггүй Олон Улсын хөтөлбөртэй сургууль улсын 6 бүс дээр байгуулахад хэлбэр, тогтолцоо нь яг энэ загвар юм шүү гэдгийг боловсролын удирдлагууд өөрсдөө нүдээрээ үзлээ.

За ажлын өдөр эхлэнгүүт төсвийн тодотгол дээр АН-ын 2 гишүүний ямар ч бодлогогүй, амьдрал мэдэхгүйгээр гаргасан саналыг МАН-ай нэр бүхий гишүүд дэмжсэнээр Энх-Амгаланг хорлох гэж байгаад нийслэлийн 30.000 хүүхдийг хорлосон шийдвэр гаргаж 60 сургуулийн түрээсийн 13.9 тэрбум төгрөгийг хасууллаа.

Гэхдээ би Хотхоны бага сургууль, Төрөлжсөн ахлах сургуулийн төлөвлөлтөөс хэзээ ч ухрахгүй. Ирэх жил нэмж 50 хотхоны бага сургууль, 20 төрөлжсөн ахлах сургуулийг байгуулж хүүхдүүд ангидаа 35-40 хүүхдээс хэтрэхгүй сурдаг болгож, 3 ээлжээр хичээллэдэг сургууль гэдэг ойлголтыг нэг мөр байхгүй болгоно.

Дээд боловсролын чадавхыг бэхжүүлэх Эрасмус төслийн нэгдсэн уулзалт боллоо. Боловсролын яамнаас Баян-Өлгий аймагт боловсролын чанар, хүртээмжийг сайжруулах зорилгоор зөвлөн туслах ажлын 50 орчим хүний бүрэлдэхүүнтэй хэсэг ажиллаад ирлээ.

Бүгд Найрамдах Финланд Улсын Турку их сургуулийн хамтын ажиллагаа хариуцсан захирал Ари Коски болон Eduten компанийн үүсгэн байгуулагч Хэнри Мүүримаатай уулзлаа.

Их Британийн найруулагч Зена Густхардтай уулзаж, ерөнхий боловсролын сургуулийн дуу хөгжмийн багш нарын мэргэжлийн хөгжлийг дэмжих чиглэлээр хамтран ажиллана.

Зена Густхард нь Майкл Жексоны "MJ The Musical", Дэнзэн, Шер нарын "Burlesque", "Bat Out of Hell" зэрэг дэлхийд алдартай томоохон шоу, мюзиклүүдийн бүжгийн дэглээчээр ажиллаж байсан туршлагатай уран бүтээлч, найруулагч.

Европын Холбооны гишүүн орнуудын төлөөлөлтэй хамтран Эрасмус + хөтөлбөр болон олон улсын санхүүжилт, тэтгэлэгт суралцах боломжуудыг танилцуулах мэдээллийн уулзалтыг зохион байгууллаа.
Эрт илрүүлэх үзлэгийн явцтай 31 дүгээр сургууль дээр очиж танилцлаа. Эрт илрүүлэх үзлэгт 54,212 суралцагч бүрэн хамрагдаад байна.

Эхний 14 хоногийн байдлаар улсын хэмжээнд 121,744 сурагч эрт илрүүлэх үзлэгт хамрагдаад явж байгаа бол үзлэг нь бүрэн дууссан 54,212 суралцагч байна. Одоогоор хамрагдах ёстой сурагчдын 20 орчим хувь нь үзлэгт бүрэн хамрагджээ.

УИХ-ын Хүний хөгжлийн байнгын хорооноос санаачлан Боловсролын салбарын төсвийн хэлэлцүүлэг болж өнгөрлөө. Зохион байгуулалттай, нэр бүхий сургуулиас хүмүүс бэлдэж оруулж ирсэн нь илт мэдрэгдсэн.

Өнгөрсөн 7 хоногийн сүүлийн ажлын өдөр КОЙКА-ийн Суурин төлөөлөгч Жу Хэйн Нантай уулзаж, сургуулийн хоол үйлдвэрлэлийн төслийн хэрэгжилтийн талаар санал солилцлоо.

Л.Энх-Амгалан: "Гэрт ойрхон сургууль" ажлаасаа хэзээ ч няцахгүй, үргэлжлүүлнэ