УИХ-ЫН ГИШҮҮН, ӨРГӨДЛИЙН БАЙНГЫН ХОРООНЫ ДАРГА О.НОМИНЧИМЭГ:

Улсын төсөв ид яригдаж байгаа үед яамд тэр дундаа БСШУЯ-наас асуудлаа хэрхэн эрэмбэлж байгаа нь тодорхойгүй цөөнгүй асуудал харагдаж байна. Үүний нэг нь хүүхдийн үдийн хоолтой холбоотой асуудал.

НҮБ-ын Хүүхдийн эрхийн тухай конвенцид зааснаар “Хүүхдийн эрхийг хэрэгжүүлэхэд шаардлагатай бүх арга хэмжээг авахын тулд төр нөөцөө боломжит дээд хэмжээнд хүүхдийн төлөө ашиглах зарчим”-тай. Тийм ч учраас өнгөрсөн хавраас эхлээд манай Өргөдлийн байнгын хороо Хүүхдийн үдийн хоолны зардлыг хүүхдийн шим тэжээлийн хэрэгцээнд нийцүүлэн нэмэгдүүлэх, ЕБС-ийн 6-12 дугаар ангийн сурагчдыг үе шаттайгаар үдийн хоолонд хамруулах хэрэгцээтэй байгааг онцолж, улмаар УИХ-ын 28 дугаар тогтоолыг өнгөрөгч зургаадугаар сард батлуулсан билээ. Салбарын яамтай ч энэ асуудлаар ойлголцож, хоолны норматив зардал өсөхгүй байгаа байдлыг өөрчилье гээд хүүхдийн үдийн хоол болоод дотуур байрны хүүхдүүдийн хоолны норматив зардлыг нэмэх, эхний шатанд 6-7 дугаар ангийн хүүхдүүдээ үдийн хоол хөтөлбөрт нэмж хамруулах үүрэг өгсөн.

Гэвч 2027 оны төсөвт нэг асуудлыг нь шийдээд нөгөөг нь үлдээгээд оруулж ирэв. Сурагчдыг цахимжуулах нэрээр хроумбүүк авахад хэдэн зуун тэрбумаар нь зарцуулах гэж байж, эхний шатанд 6-7 дугаар ангийн 137,638 сурагчийг “Үдийн хоол” хөтөлбөрт хамруулах 86.5 тэрбум төгрөгийг хэмнээд байж болохгүй гэж үзсэн учраас зарчмын зөрүүтэй саналыг хураалгаж, Байнгын хороогоороо дэмжүүлж чадлаа.

Ирэх жил 6-7 дугаар ангийнхан маань үдийн хоолтойгоо болж байж, дараа дараагийн удаад том ангийнхан нь хамрагдах боломжтой болно. Хүүхдүүдийнхээ төлөө ядаж эхний шатанд гээд “Үдийн хоол” хөтөлбөртэй холбоотой хоёрхон даалгавар Өргөдлийн байнгын хороо, цаашлаад УИХ-аас тогтоол гаргаж өгөөд байхад талыг нь унагаад оруулж ирээд байж болохгүй ээ. Баталсан хууль, тогтоол шийдвэрээ төсөв, санхүүжилттэйгээ уялдуулж хэрэгжүүлдэг соёлд суралцах нөгөө талдаа хүүхдүүдээс хэзээ ч хасч, харамлаж болохгүй гэдгийг үе, үеийн төсөв захиран зарцуулагч нар ойлгомоор байна.

Монгол Улсад хүүхдийн эрхийг хангах, боловсрол, эрүүл мэнд, хүүхэд хамгаалал, хөгжлийн үйлчилгээг хүртээмжтэй хүргэхэд төрийн санхүүжилт шийдвэрлэх үүрэгтэй гэдгийг ойлгодог эрхэм төрийн түшээд маань дэмжин, УИХ-аар баталж өгнө гэдэгт эргэлзэхгүй байна.

О.Номинчимэг: 6-7 дугаар ангийн 137,638 сурагчийг “Үдийн хоол” хөтөлбөрт хамруулах төсвийг хэмнэж болохгүй!