Бүгд Найрамдах Солонгос Улсын Сөүл хотноо зохион байгуулагдаж буй “International Railway Procurement Briefing & 1:1 Business Meetings 2026” олон улсын арга хэмжээнд “Монголын төмөр зам” ТӨХК-ийн төлөөлөл оролцож байна.

БНСУ-ын Төмөр замын аж үйлдвэрийн холбоо (KORASS)-ноос зохион байгуулж буй тус арга хэмжээнд 9 улсын төмөр замын салбарын 15 байгууллагын төлөөлөл оролцож, төмөр замын шинэ төсөл, хөтөлбөрүүд, худалдан авах ажиллагааны тогтолцоо, олон улсын тендерт оролцох нөхцөл, шаардлага болон хамтын ажиллагааны боломжийн талаар мэдээлэл солилцлоо.

Чуулганы үеэр “Монголын төмөр зам” ТӨХК-ийн Худалдан авалтын мэргэжилтэн Э.Дөлгөөн Монгол Улсын төмөр замын салбарын хөгжил, компанийн хэрэгжүүлж буй болон цаашид хэрэгжүүлэхээр төлөвлөж буй төслүүд, худалдан авах ажиллагааны эрх зүйн орчин, гадаадын аж ахуйн нэгжүүдийн оролцох боломжийн талаар илтгэл танилцуулав.

БНСУ-ын “Rail Economy News” (철도경제신문) хэвлэл тус арга хэмжээг сурвалжлахдаа “Монголын төмөр зам” ТӨХК чуулганы эхний илтгэлийг танилцуулсныг онцолжээ. Мөн Монгол Улсын төмөр замын шинэ төслүүдийн хүрээнд БНСУ-ын компаниудтай хөдлөх бүрэлдэхүүн, дохиолол, холбоо, дэд бүтцийн засвар үйлчилгээ, логистик болон төслийн санхүүжилтийн чиглэлээр хамтран ажиллах сонирхолтой байгааг мэдээлсэн байна.

Олон улсын төмөр замын худалдан авах ажиллагааны чуулганд оролцож байна