УИХ-ын гишүүн Ж.Чинбүрэн Бүгд Найрамдах Энэтхэг Улсаас Монгол Улсад суугаа Онц бөгөөд Бүрэн эрхт Элчин сайд Эрхэмсэг ноён Атул Малхари Готсурвэг хүлээн авч, халуун дотно, ажил хэрэгч уулзалт хийлээ.

УИХ дахь Монгол-Энэтхэгийн парламентын бүлгийн даргын хувьд хоёр орны Стратегийн түншлэлийг бодит үр дүнгээр баяжуулах, хамтын ажиллагааг өргөжүүлэх чиглэлээр дараах төслүүдийн талаар хэлэлцлээ.

1. Газрын тос боловсруулах үйлдвэр: Монгол Улсын Ерөнхийлөгч Khurelsukh Ukhnaa санаачилгаар эхлүүлсэн газрын тос боловсруулах үйлдвэрийн бүтээн байгуулалт амжилттай үргэлжилж байна. Цаашид бүтээн байгуулалтыг эрчимжүүлж, 2028 онд хугацаанд нь ашиглалтад оруулахад парламентын зүгээс онцгой анхаарч ажиллаж буйг тэмдэглэлээ.

2. Боловсрол, хүний нөөц: 1,200 хүүхдийн суудалтай Монгол-Энэтхэгийн найрамдлын сургууль, Атал Бихари Важпайн нэрэмжит мэдээллийн технологи, харилцаа холбоо, аутсорсингийн шилдэг төвийн төслүүдийг урагшлуулах, Энэтхэгийн тэтгэлэгт хөтөлбөрт сум, орон нутгийн эмч нарыг хамруулж, мэргэшүүлэх боломжийг нэмэгдүүлэх талаар ярилцлаа.

3. Худалдаа, эдийн засаг: Газрын ховор элемент, коксжих нүүрсний худалдааг өргөжүүлж, Монголын бүтээгдэхүүний Энэтхэгийн зах зээлд нэвтрэх боломжийг нэмэгдүүлэх талаар санал солилцов.

4. Эрүүл мэнд, технологи: Эм, эмнэлгийн хэрэгсэл, тоног төхөөрөмжийн хамтын ажиллагааг өргөжүүлэх, мэдээллийн технологи, хиймэл оюуны салбарт Энэтхэгийн туршлага, чадавхад тулгуурлан хамтран ажиллах боломжийг хэлэлцлээ.

“Хоёр орны Стратегийн түншлэлийг бэхжүүлж, хамтын ажиллагааг бодит үр дүнд хүргэхэд УИХ дахь Монгол-Энэтхэгийн парламентын бүлэг чухал үүрэг гүйцэтгэдэг. Эрхэм Элчин сайд Атул Малхари Готсурве Танд Монгол, Энэтхэгийн найрсаг харилцаа, хамтын ажиллагааг өргөжүүлэн хөгжүүлэхэд оруулж буй үнэтэй хувь нэмэрт талархал илэрхийлье” хэмээн УИХ-ын гишүүн Ж.Чинбүрэн тодотгов.

Монгол, Энэтхэгийн хамтын ажиллагааг өргөжүүлэх асуудлаар Парламентын бүлгийн дарга нар санал солилцов