УИХ-ын гишүүн, Боловсролын сайд Л.Энх-Амгалангийн 7 хоног бүр хүргэдэг тойм мэдээлэлтэй танилцана уу.

ХОТХОНЫ 183 ДУГААР СУРГУУЛЬ БУЮУ ЭНХАУС ЖИШИГ СУРГУУЛЬ

Өнгөрсөн 7 хоногийн бямба гараг буюу 10 дугаар сарын 31-нд хотхоны бага сургууль буюу 183 дугаар сургууль дээр очиж танилцлаа. Өнгөрсөн жил 183 дугаар сургууль нэгдүгээр ангийн 11 бүлэгтэй, нэг ангид 47-оос дээш хүүхэд сурч байсан. Энэ жил хотхоны бага сургууль хийснээр нэгдүгээр ангийн 10 бүлэг авч, нэг анги дүүргэлт 35 хүртэл хүүхэдтэй, багш нарын ачаалал буурсан, хүүхдүүд гэрийнхээ дэргэд сургуультай болсон сайхан ажил боллоо гэдгийг хэлж байна. Үүнээс гадна 183 дугаар сургууль ЭНХАУС буюу эрүүл, ногоон, хүртээмжтэй, аюулгүй, ухаалаг сургууль болсон байна. Энэ жишиг сургуулиас бусад сургуулиуд үлгэрлэж суралцмаар байна.

ХУУЛЬ ЗӨРЧӨӨГҮЙ ХОТХОНЫ БАГА СУРГУУЛИЙГ ХИЙСНЭЭ ЗАРЛАГЫН ХЯНАЛТЫН ДЭД ХОРООНД ТАЙЛАГНАСААР ХҮҮХДҮҮД СУРГУУЛЬДАА ДУЛААН ӨВӨЛЖИХ ЭРХ НЭЭГДЛЭЭ

УИХ-ын Төсвийн зарлагын хяналтын дэд хорооны хуралдаанаар УИХ-ын гишүүн Б.Жаргалан нарын тавьсан “Хотхоны бага сургууль байгуулахад Боловсролын сайд Л.Энх-Амгалан хууль зөрчсөн үү” гэсэн асуулгад хариулт өгч, нэрээ цэвэрлэлээ. Намайг төсөв батлагдаагүй байхад хотхоны бага сургууль хийж, хууль зөрчлөө хэмээн огцрох шаардлага тавьж байсан. Би нэг ч хуулийн заалт зөрчөөгүйгээр хотхоны бага сургуулийг хийсэн гэдгээ УИХ-ын Төсвийн зарлагын дэд хороонд мэдэгдлээ. Үүнийг Монголын аудиториуд нотолж, АТГ дүгнэлтээ гаргасан байгаа. Ингээд миний нэр цэвэрлэгдэж, хүүхдүүд маань хотхоны бага сургуульдаа дулаан өвөлжих эрх нь нээгдэж байна гэсэн үг. Улаанбаатар хотод нэг анги 45-аас дээш хүүхэдтэй байсан бол хотхоны бага сургууль хийснээр нэг анги 35 хүүхэдтэй суралцаж, үр дүнгээ өгч байна.
Ганцхан хотхоны бага сургуулиар зогсохгүй төрөлжсөн ахлах сургуулийг энэ жил зөвхөн Улаанбаатар хотод биш бүх аймагт эхлүүлсэн.

ХОЁРДУГААР УЛИРЛААС ЭХЛЭН НЭГДҮГЭЭР АНГИЙН СУРАГЧДАД НИЙГЭМШИЛ, СЭТГЭЛ ХӨДЛӨЛИЙН ХИЧЭЭЛ ОРНО

Хичээлийн хоёрдугаар улирлаас Нийгэмшил-сэтгэл хөдлөлийн хичээлүүдийг үзнэ. Энэ бол сэтгэл зүрхний боловсрол. Сэтгэлийн тамиртай хүүхэд бэлтгэх хамгийн гол зүйл бол Нийгэмшил-сэтгэл хөдлөлийн хичээл байх болно. Үүний бэлтгэл ажилтай нь танилцлаа. Энэ нь оюуны тамиртай, сэтгэлийн тамиртай хүүхэд бэлдэхэд хамгийн чухал хичээл байх болно гэдгийг долоо хоногийнхоо хамгийн онцлох уулзалт, хэлэлцүүлгээр тэмдэглэмээр байна.
Сүүлийн үед төрөлт огцом багассанаар хувийн цэцэрлэгүүд, төрийн сургуулиудад хүүхэд багасаж байна. Энэ жил хийсэн хотхоны 21 бага сургуулийн 17 нь цэцэрлэг дээр суурилсан. Цэцэрлэгийн хүртээмж, бага сургуулиудын хүүхдүүдтэй хэрхэн хамтарч ажиллах талаар долоо хоногийн хугацаатай Ажлын хэсэг байгуулж ажиллаж байна. Сугалааны цэцэрлэгийн тогтолцоог халахад хувийн цэцэрлэгүүд их үүрэг гүйцэтгэсэн.

ОРОН НУТГИЙН 12 СУРГУУЛЬД ҮЕ ТЭНГИЙН ДЭЭРЭЛХЭЛТГҮЙ БАЙХ ОРЧНЫГ САЙЖРУУЛНА

Сангийн сайд АХБ-тай хамтарч манай салбарт хэрэгжих орон нутагт 4 дотуур байр, 12 сургууль дээр үе тэнгийн дээрэлхэлтгүй байх орчныг сайжруулахаар боллоо. ЭНХАУС буюу эрүүл, ногоон, хүртээмжтэй, аюулгүй, ухаалаг сургууль, дотуур байранд амьдрах хүүхдүүдэд энэ нь цогц хөтөлбөр болж хэрэгжинэ. Хүчирхийлэлд өртсөн хүүхэд, эмэгтэйчүүдэд хөдөөгийн сум дээр, сургууль, дотуур байранд яаж хэрэгжүүлэх загвар болгоно.
ЕБС-иудын Дуу хөгжмийн 600 гаруй багш нарын ур чадварыг дээшлүүлэхээр Олон улсын мастер багш нарын сургалт зохион байгуулж байна. Бүтээлч сэтгэлгээг хөгжүүлж чаддаг чадварыг дуу хөгжмөөр олгодог. Дуу хөгжмийн багш нар бол хүн бүтээгчид.
ТИКА-гийн шинэ захирал томилогдон ирлээ. ТИКА өнгөрсөн хугацаанд боловсролын салбарт 700 орчим төсөл, хөтөлбөрт хэрэгжүүлсэн. ТИКА-тай хамтраад ШУТИС Байгалийн ухааны лаборатори оруулж ирж байна. ШУТИС-ийн харьяа төрөлжсөн ахлах сургуулиудаар Байгалийн ухааны лабораториудыг нийлүүлж хамтарч ажиллах боловсон хүчин, багш нараа бэлтгэн, ур чадварыг сайжруулах чухал ажил болж байна.
Монгол Улсын Ерөнхийлөгч асан Н.Энхбаярын санаачилгаар “Бидний эрх-Бидний амьдралд” гэдэг хүний эрх, эрх чөлөөний тухай ойлголтуудыг бусад хичээлээр дамжуулж хүүхдэд олгохоор болж, багш нараа сургалтад хамрууллаа.

СУРАГЧДЫН ЦҮНХНИЙ ЖИНГ БУУРУУЛАХ АРГА ХЭМЖЭЭГ НЭГДҮГЭЭР АНГИАС ЭХЛҮҮЛЛЭЭ

Сурагчдын цүнх биеийн жингийн 10 хувиас хэтрэхгүй байх талаар судалгааг танилцууллаа. Гэтэл 1-5 дугаар ангийн сурагчдын 68 хувь нь биеийн жингийнхээ 15 хувиас давсан жинтэй цүнх үүрч байгаа судалгаа гарсан. Энэ хичээлийн жил нэгдүгээр ангийн сурагчдын цүнхний жинг бодитоор бууруулах ажлыг хөтөлбөрийн шинэчлэл, сурах бичгийн шинэчлэлээр хийсэн.
Ингээд судалж, хэлэлцэж, шийдэл гаргасан долоо хоног байлаа. Хоёрдугаар улирлын хичээлийн жил даваа гарагаас эхэлнэ.Үүнтэй холбогдуулж нийслэлийн ЕБС, цэцэрлэгүүдийн удирдлагуудыг урьж, нэгдүгээр улирлын ажлуудаа дүгнэж, хоёрдугаар улирлын хичээлийн жилийн онцлог буюу гэрт ойрхон сургуулиа яаж урагшлуулах талаар ярилцлаа. Эрүүл мэндийн урьдчилан сэргийлэх эрт илрүүлэх үзлэгт нийт хүүхдүүдийн 80 хувь нь хамрагдаад байна. Сургууль цэцэрлэгт суурилсан үндэсний Эрт илрүүлэх үзлэг бол таны үр хүүхдэд хамгийн чухал асуудал учраас хүүхдүүдээ хамрагдуулахад эцэг, эхчүүд та бүхэн бидэнтэй хамтарч хяналт тавьж, оролцоогоо дээшлүүлээрэй.

Боловсролын салбарын 7 хоногийн тойм