“Соёлын бүтээлч сар” аяны хүрээнд Кино урлагийн зөвлөлөөс харааны бэрхшээлтэй иргэдэд зориулан найруулагч Б.Тамирын “Тусгаар тогтнол, Э.Ёндоншаравын "Тойг" хэмээх богино хэмжээний уран сайхны киног тусгай аудио тайлбартайгаар “ Өргөө” кино театрын дэлгэцнээ толилууллаа.

Арга хэмжээнд 80 орчим иргэд оролцсон бөгөөд Кино урлагийн зөвлөлийн дарга Ч.Ундрал “Соёл, урлагийг бүх иргэнд тэгш хүртээмжтэй болгох нь салбарын зайлшгүй зорилт, цаашдаа энэхүү хүртээмжийг нэмэгдүүлэхэд анхаарч ажиллана” гэдгийг онцолсон юм.

Анх удаа кино театрт аудио тайлбартай кино үзэж буй харааны бэрхшээлтэй иргэд талархал илэрхийлж байлаа. Тэд “Өмнө нь би зүгээр л дууг нь сонсоод ойлгож байна гэж боддог байсан юм байна. Харин энэ удаа киноны бүх үйл явдал нүдэн дээр ил болсон.” “Өмнө нь бид гэртээ кино үзэхдээ гэр бүлийн хүнээрээ тайлбарлуулдаг байсан. Өнөөдөр би бусдын тусламжгүйгээр кино үзлээ. Энэ бол бидэнд өгч буй хамгийн том бэлэг.” хэмээн талархал илэрхийллээ.

Монголын хараагүйчүүдийн үндэсний холбооны Ерөнхийлөгч Ч.Дэлгэрмаа:
“Хөгжлийн бэрхшээлтэй хүний эрхийн тухай конвенцын 30 дугаар зүйлд соёл урлагийн хүртээмжийг хангах гэж заасан байдаг. Энэ бол дэлхийн хөгжилтэй хөл нийлүүлж буй сайхан боломж гэж харж байгаа. Соёл урлаг, үзвэр, үйлчилгээний хүртээмжийг нэмэгдүүлэх гэдэг бол зөвхөн харааны бэрхшээлтэй иргэдийн асуудал биш. Настай хүмүүс, хараа нь муудсан иргэд ч дууг нь сонсоод кино үзэх боломжтой”.

“Амь нэгдэл” ТББ-ын үүсгэн байгуулагч А.Сайханцэцэг:
“Кино урлагийн зөвлөл бидний хүсэлтийг хүлээн авч киног аудио тайлбартай болгоход дэмжлэг үзүүлж буйд талархаж байна. Цаашдаа бусад уран бүтээлчид маань олон киног дохионы тайлбартай, аудио тайлбартай хийж өгч, харааны болон сонсголын бэрхшээлтэй иргэдээ кино урлагаар дамжуулан соён гэгээрэх хөгжилд нь үнэтэй хувь нэмэр оруулаасай гэж хүсэж байна. Энэхүү төслийг хэрэгжүүлж буй, бас дэмжсэн бүх хүмүүстээ баярлалаа” .

Энэ арга хэмжээг Кино урлагийн зөвлөлтэй хамтран Өргөө кино театр, Монголын хараагүйчүүдийн үндэсний холбоо, “Амь нэгдэл” ТББ-д, Ерөнхий боловсролын 29-р сургууль хамтран зохион байгуулжээ.

Хараагаараа биш, чихээрээ “үздэг” тэдэнд хүртээмжтэй кино үзэх боломж нэмэгдсээр