УИХ-ын хаврын чуулган өндөрлөх дөхсөн энэ өдрүүдэд эрхэм гишүүд хуулиудыг бөөндөн баталж байгаа юм. Гэтэл "Бушуу туулай борвиндоо баастай" гэгчээр өчигдөр төрсөн зарим хууль өнөөдөр нэмэлт, өөрчлөлт шаардаж эхэлсэн байна. Энэ талаар УИХ-ын гишүүн П.Алтангэрэл хэвлэлийн бага хурал хийлгэлээ.

Чуулганы нэгдсэн хуралдаанаар Цөмийн энергийн тухай хууль баталсан юм. Гэтэл хамгийн анхаарал, болгоомжтой гаргах ёстой байсан уг хуулийг нэг бус цоорхойтой баталжээ. Гишүүн П.Алтангэрэл "Оюутолгой,
Тавантолгойн гэрээний тухай асуудлын дуулианд Цөмийн энергийн тухай асуудал бүрхэгдэж өнгөрөх гэж байна. Уран бол Монголын хувьд шинэ салбар.

Хууль тогтоогчид Цөмийн энергийн тухай хуулийг долоо хэмжиж нэг огтлох зарчмаар батлах ёстой байсан. "

Бороо гоулд"-ын алдаа энэ хуульд давтагдах ёсгүй байсан. Хуулийн эхний хэлэлцүүлгийг хойшлуулаад УИХ-ын намрын чуулганаар хэлэлцүүлье гэсэн боловч УИХ-ын дарга тэр саналыг хүлээж авалгүй шууд батлууллаа. Хууль нэг бус нэлээд хэдэн цоорхойтой гарсан. Эхний бөгөөд эцсийн хэлэлцүүлгийг нэг өдөрт шахаж хийсэн нь үндэсний аюулгүй байдалд ч ноцтой хохиролтой зүйл.

Ураны бусад ашигт малтмалаас онцгой зүйл нь ашиглах, боловсруулах явцын хяналтын тогтолцоо байдаг. Үүнийг хэнээс ч хараат бус хөндлөнгийн байгууллага хянах ёстой. Гэтэл Засгийн газрын харьяа Цөмийн энергийн газарт үүнийг даатгачихсан. Газрын дарга нь цөмийн энергитэй холбоотой бүх газарт алба хашихаар байгаа. Ингэснээрээ Цөмийн энергийн агентлагийн журмыг ноцтой зөрчсөн, стандарт зөрчсөн хууль гарлаа.

Монгол орны хөгжлийн төвшнийг өндөрт гаргах ёстой байсан салбарын хууль хөгжлийг доош татахаар байдалтай батлагдлаа. Хуульд нэмэлт, өөрчлөлт оруулах шаардлагатай" гэв. Шинэхэн төрсөн хуульд засвар хэрэгтэйг УИХ-ын дарга Д.Дэмбэрэл ч чуулганы хуралдаан дээр хэлж байсан юм.