УИХ-ын гишүүн О.Баасанхүү өөрийн хүсэлтээр “Шударга ёс” эвслийн бүлгийн дэд даргын албан тушаалаа хүлээлгэн өгсөн. Түүнийг сангийн сайд Ч.Улаан хүлээн авсан юм.  Ямар учраас бүлгийн дэд даргын албан тушаалаасаа татгалзсан талаар нь УИХ-ын гишүүн О.Баасанхүүгээс тодруулахад доорхи хариултыг өгсөн юм. 

-“Шударга ёс” эвслийн бүлгийн дэд даргын албан тушаалаас сайн дураараа татгалзах болсон шалтгаан тань юу юм бэ?

-Хэд, хэдэн шалтгааны улмаас “Шударга ёс” эвслийн бүлгийн дэд даргын албан тушаалыг хүлээлгэн өгсөн. Нэгдүгээрт, УИХ-ын тухай хуульд бүлгийн дэд дарга гэсэн орон тоо байдаггүй. Тиймээс парламентад суудалтай намуудын бүлгийн дэд дарга гэдэг бол албан бус гэсэн үг. Энэ ч үүднээс би “Шударга ёс” эвслийн бүлгийн дэд дарга болсныхоо дараа бүлгийн дэд даргын эрх, үүргийг бүлгийн дүрэмд тусгаж өгөхийг хүссэн юм. Харамсалтай нь тэр асуудлыг бүлгийнхэн маань тэгсхийгээд замхруулсан.

Нөгөөтэйгүүр, хэдэн ч нам хамтарсан бай бүлэг гэдэг цул байх ёстой. Гэтэл өнөөдөр “Шударга ёс” эвслийн бүлгийн гишүүд нэг цул байж чадахгүй байна. Наад зах нь Засгийн газраас гаргах гэж буй таван тэрбум ам.долларын бонд, Төрийн тусгай албан хаагчдын нэгдсэн эмнэлгийг нүүлгэх, Хууль зүйн дэд сайд Э.Эрдэнэжамъяантай холбоотой зэрэг олны анхаарлын төвд ороод буй асуудлуудыг бүлгийн хурлаар хэлэлцээд ямар байр суурь баримталж байгаагаа албан ёсоор мэдээлчихэж чадахгүй  байна шүү дээ.

-Бүлэг цул байж чадахгүй  байгаа нь бүлгийн дарга ажлаа хийж чадахгүй байгаагийн илрэл үү?

-Асуудлын гол нь бүлгийн даргын хийж байгаа ажилд байгаа юм биш л дээ. Манай бүлгийн дарга бол олон жил улс төрд сайн, муугаа хэлүүлж явсан хүн. Ямар үед юу ярих вэ гэдгээ мэднэ гэсэн үг. Ер нь бол бүлгийн гишүүд даргынхаа үйл ажиллагаанд хяналт тавьж ажиллах ёстой. Үүний тулд бүлгийн дэд даргатайгаа хамтарч ажиллах хэрэгтэй байсан юм.

Гэтэл бүлгийн даргыг эзгүй хойгуур орлох үүрэгтэй бүлгийн дэд дарга гэсэн эрх, үүрэг нь тодорхойгүй нэр төдий албан тушаал өгчихөөд дараа нь хариуцлага нэхэх асуудал гарвал намайг буруутгах гээд байгаа нь таалагдахгүй байсан юм. Хэрэв эрх, үүргийг маань тодорхой болгоод өгчихсөн байсан бол асуудал өөрөөр эргэж болох байсан.