Шинэ оны анхны хуулийн төслийг УИХ-ын гишүүн Ц.Мөнх-Оргил, Д.Одхүү, Р.Амаржаргал, Ц.Баярсайхан, Э.Бат-Үүл, С.Бямбацогт, Ж.Батсуурь, Р.Буд, Я.Батсуурь, Б.Чойжилсүрэн нар санаачилснаа УИХ-ын дарга Д.Дэмбэрэлд өнөөдөр өргөн барив.

Эрхэм гишүүдийн санаачилсан Концессын тухай хуулийн төсөл нь найман бүлэг, 37 зүйлтэй бөгөөд эл асуудлаархи төрийн байгууллагуудын эрх, үүрэг, концессын зүйлийн жагсаалт боловсруулах, батлахтай холбогдсон зохицуулалт, уралдаант шалгаруулалт зохион байгуулах, үнэлэх, дүгнэх, шийдвэр гаргах үйл ажиллагаа, концессын гэрээ, түүний нөхцөл, нэмэлт, өөрчлөлт оруулах, хугацааг сунгах, цуцлах, дуусгавар болгох, хэрэгжилтэд хэрхэн хяналт тавих зэрэг эрх зүйн зохицуулалтыг тусгажээ.

Уг нь Засгийн газраас Концессын тухай хуулийн төслийг санаачлан 2009 оны долдугаар сарын 22-нд УИХ-д өргөн мэдүүлсэн. Гэвч төслийг Байнгын хорооны хэлэлцүүлэгт бэлтгэх явцад Эдийн засгийн болон Хууль зүйн байнгын хорооны хамтарсан ажлын хэсгээс хуулийн төсөлд нэмж тусгах, өөрчлөх, өөрчлөн найруулахаар гаргасан санал нь уг хуулийн төслийн бүтцийн тавиас дээш хувийг өөрчлөхөөр байсан тул ажлын хэсгийн гишүүд Концессын тухай хуулийн төслийг дахин нэгтгэн боловсруулсан байна.

Хуулийн төслийг боловсруулахдаа Засгийн газраас өргөн мэдүүлсэн Концессын тухай хуулийн төсөл болон НҮБ-ын Олон улсын худалдааны эрхийн комиссоос гаргасан “Хувийн санхүүжилт бүхий дэд бүтцийн салбар дахь төслийн загвар эрх зүйн заалтууд”, Эдийн засгийн хамтын ажиллагаа, хөгжлийн байгууллагаас гаргасан “Концессын гэрээний тухай хуулийн үндсэн заалтууд” баримт бичгүүд, Азийн хөгжлийн банк, НҮБ-ын Хөгжлийн хөтөлбөр, АНУ-ын Олон улсын хөгжлийн агентлагаас хуулийн төслийн талаар гаргасан зөвлөмж зэргийг харгалзан үзсэнээ төслийн танилцуулгад дурьдсан байна гэж УИХ-ын Хэвлэл мэдээлэл, сурталчилгааны хэлтэс мэдээлэв.