Өнөөдөр УИХ дахь Хууль зүйн байнгын хорооны хуралдаанаар Улсын Их Хурлын дэд дарга С.Баярцогт даргалж, Шүүх байгуулах тухай хуулийн /Шинэчилсэн найруулга/ болон “Шүүгчийн орон тоо батлах тухай” Улсын Их Хурлын тогтоолын эцсийн хувилбарын төсөл болон эцсийн хэлэлцүүлэгт бэлтгэсэн тухай танилцуулгыг сонсов. Танилцуулгыг ажлын хэсгийн гишүүн, Улсын Их Хурлын гишүүн Ж.Батзандан хийв.

Тухайн асуудлаар Улсын Их Хурлын гишүүн Р.Бурмаа, Х.Болорчулуун нар зарчмын зөрөөтэй санал гаргаж санал хураалгахад Байнгын хорооны гишүүдийн гуравны хоёроос дээш хувийн саналаар тухайн асуудал дэмжигдсэн.

Улсын Их Хурлын чуулганы нэгдсэн хуралдаанд тус Байнгын хорооны санал дүгнэлтийг Улсын Их Хурлын гишүүн Р.Гончигдорж танилцуулахаар болов. Хаягжуулалтын тухай, Нийслэлийн эрх зүйн байдлын тухай хуульд өөрчлөлт оруулах тухай хуулийн төслийн хэлэлцэх эсэх асуудлыг хэлэлцэхэд Улсын Их Хурлын гишүүн Д.Лүндээжанцан, Ц.Оюунбаатар, Л.Цог асуулт тавьж, санал хэлсний дараа Байнгын хорооны хуралдаанд оролцсон гишүүд тухайн асуудлыг санал нэгтэй дэмжсэн.

Хэлэлцэж буй асуудалтай холбогдуулан Монгол Улсын сайд, Засгийн газрын Хэрэг эрхлэх газрын дарга Ч.Сайханбилэг, Засгийн газрын Хэрэг эрхлэх газрын Хууль, эрх зүйн газрын дарга Д.Мөнх-Эрдэнэ, Газрын харилцаа, геодези, зураг зүйн газрын даргын үүргийг түр орлон гүйцэтгэгч А.Хүрэлшагай, Улсын бүртгэлийн ерөнхий газрын даргын үүргийг түр орлон гүйцэтгэгч Ц.Пүрэвдорж, Улсын бүртгэлийн ерөнхий газрын Мэдээлэл технологын газрын орлогч дарга Б.Чимэддорж, Улсын бүртгэлийн ерөнхий газрын Бүртгэлийн газрын орлогч дарга Г.Цэцгээ нар оролцов.

Улсын Их Хурлын чуулганы нэгдсэн хуралдаанд Байнгын хорооны санал дүгнэлтийг Улсын Их Хурлын гишүүн Д.Лүндээжанцан танилцуулахаар болов. Байнгын хорооны гишүүдийн зүгээс уг асуудлаар ажлын хэсэг гаргаж ажлуулах нь зүйтэй гэсэн санал гарсан тул ажлын хэсгийн ахлагчаар Улсын Их Хурлын гишүүн Ц.Оюунбаатарын нэрийг оруулж санал хураалгахад Байнгын хорооны хуралдаанд оролцсон гишүүд санал нэгтэй дэмжсэнээр хуралдаан өндөрлөв.

Шүүх байгуулах тухай хуулийг хэлэлцэв