Нийслэлийн засаг даргын тамгийн газраас баруун талдаа жолооны хүрдтэй автомашиныг хязгаарлах санал гаргаж, санал асуулгыг явуулсан. Санал асуулгаар нийт 100000 хүний гуравны хоёр нь дургүйцсэн байсан. Гэхдээ үндэслэлийг сайн гаргаж ирвэл бас ч дургүйцээд байх хэрэггүй бололтой. Учир явдлыг ухаж, хүмүүст ойлгуулах нь хамгийн чухал бөгөөд энэ сарын 20-нд дахин санал асуулга явуулсан ч асуулгын дүн гараагүй байна.

Манай улсын хэмжээнд бүртгэлтэй нийт тээврийн хэрэгслийн 49,5 хувь нь буруу талдаа жолоодлоготой. Харин нийслэлд 307000 автомашин бүртгэлтэйгээс 70 хувь нь баруун талдаа хүрдтэй аж. Зам тээврийн яамны зүгээс буруу талдаа хүрдтэй автомашины импортыг хоёр сараас эхлэн хориглох шийдвэр гаргах тухай асуудал хэлэлцэгдэж байна.

Импортын энэхүү шийдвэр нь жирийн иргэдийн цаашлаад улс орны эдийн засагт ямар үр нөлөө үзүүлэх бол гэсэн асуудлыг хөндөж өнөөдөр Хэвлэлийн хүрээлэнд Эдийн засгийн Өөрчлөгч клубийнхэн уулзалт ярилцлага хийлээ. Уулзалтад Өрсөлдөх чадвар судалгааны төвийн мэргэжилтэн Лкашми, Гаалийн ерөнхий газрын улсын ахлах байцаагч Тамир, Монголын Ложистикийн холбооны эдийн засагч Батнасан нар оролцсон юм. Буруу хүрдтэй машиныг импортлохгүй байх нэг учир нь Замын хөдөлгөөний аюулгүй байдалтай холбоотой гэж замын цагдаагийн газраас тайлбарлаж байна. Замын хөдөлгөөний аюулгүй байдлыг хангах үүднээс 2012-2020 он хүртэлх стратеги төлөвлөгөөг Засгийн газрын 164 дугаар тогтоолоор баталсан гэнэ. Иймд энэ асуудлыг цэгцлэх ёстой хэмээн мэргэжилтнүүд тайлбарлав.

Буруу хүрдтэй машиныг импортлохгүй байх шалтгааны талаар ярилцав